Kasem advaes long dokta bifo tekem meresin

Ol pipol i mas askem advaes oltaem long ol dokta mo nes abaot wan antibiotic meresin bifo oli save tekem.

Antibiotic hem i ol meresin olsem Penicillin, Amoxicillin mo ol narafala moa.

Principle Pharmacist ofisa long helt, Agnes Mathias i talem se oli awea long sam pipol we oli stap askem ol antiboitic drug long ol Pharmacist mo ol Kavman Hospital.

“Yumi stap gat ol ripot we samtaem wan patient o eniwan i jas ko insaed long wan Pharmacy olsem nomo mo askem meresin mo hem i no folem propa janel o wei blong hem,” Ms Mathias i talem.

“Mifala i stap faenem sam olsem so mifala i enkarejem ol man long pablik se sapos we yu karem wan meresin yu mas askem advaes.”

Ms Mathias i talemaot sam drugs ia we pipol i mas karem advaes long ol helt personal bifo oli save tekem.

“Sam long olgeta we mi save nemem we bae yumi save hem i Penicillin, Amoxicillin, Ampicillin, hem ia hem i sam long ol antibiotic we yumi gat long kaontri mo hem i stap long National Essential Drug list blong yumi long Ministri blong Helt.

Hemi talem se i gat drug loa we i talem se ol antibiotic drug ia i mas ko wetem advaes blong ol dokta or nurse oltaem.

Ms Mathias i talem se Ministri blong Helt i stap wok wetem ol private hospital blong mekem sua se ol pipol i mas karem ol meresin ia wetem advaes oltaem.

Drug Store long Port Vila i talem se i gat ol kastoma we oli stap ko askem ol antibiotic meresin ia witaot advaes blong ol dokta.

Wan spokswoman blong Drug Store i talem se “Ol pipol oli kam oltaem long Drug Store blong karem antibiotic witaot priscribsen.”

“Oli kam nomo from oli tink se antibiotic ia bae hem i helpem olgeta long everi sik.

“So mifala oltaem i mas askem wan priscribsen rikadem antibiotic we oli stap askem. Wan eksampol hem i Amoxicillin. Oli kam oltaem long ples ia from Amoxicillin o eni narafala fom blong antibiotic. Taem oli kam mifala i mas askem fastaem se wae nao oli wantem ol meresin ia.

“Oltaem oli talem se hed i soa, bak i soa, oli gat cold o flue mo kof.

“Mbe bifo mifala i kivim wan antibiotic long eni wan we i askem, mifala i mas talemaot long olgeta fastaem sapos meresin ia hem i stret blong tekem from sik we oli talem.”

Principle Pharmacist Ofisa long Helt i talem se sapos pipol i tekem meresin witaot wan propa advaes long wan dokta o nes mo taem oli stap tekem oltaem olsem oli save divelopmen wanem oli kolem se Antibiotic Resistance.

Hem i taem we wan man i misusum or ova usum ol antibotic meresin mo hemi no use long pepes blong hem.

Ms Mathias i talem se hem i save minim tu se taem pipol i ova usum drug ia i save mekem se ol bebet blong sik long bodi i save riak akensem stret meresin mo hemi kam expensif blong helt i save pem ol nara antibiotic drug blong faetem ol sik ia.

(Visited 143 times, 1 visits today)

You might be interested in