Kastom education diskasen long Port Vila

Wan diskasen i tekem ples long Chiefs Nakamal blong lukluk olsem wanem kastom education i save ko long skul curriculum blong Vanuatu.

Director blong Tertiary Education long Ministry blong Education mo Training, Ann-Rose Tjionbang, i talem se konfrens we i tekem ples hemi impoten blong karem tingting blong pablik long hem.

Hemi talem se education mo identiti blong ol Vanuatu pipol hemi impoten long saed blong kastom mo kalja.

“Symposium ia hemi pat blong plante diskasen we i hapen long past abaot wari se kastom mo kalja blong Vanuatu i stap lus,” Mrs Tjiobang i talem.

“Yumi nid blong save se yumi hu; yumi kamaot wea.

“Ol diskasem hemi lukluk long ol tingting blong mas kat moa kaljarol heritage mo  traditional save insaed long system blong education long kaontri.

Director blong Vanuatu Cultural Center, Richard Shing, i talem se hemi gud we Lycee Loius Antoine de Bouganville i stap kat ol trening blong kastom mo kalja blong ol skul pikinini.

“Evri skul i sud mekem olsem Lycee skul blong ol skul pikinini i save moa long kastom mo kalja blong olgeta,” Mr Shing i talem.

“Sapos wan skul i long Pentecost, hemi mas statem ol klas blong kastom mo kalja blong aelan ia long skul.

“Yumi stap long wan taem we yumi stap adoptem ol laefstyle blong ol pipol ovasi mo yumi lusum ol fasin mo kastom blong yumi.

“Hemia hemi rili impoten blong holem taet ol fasin blong respek from hemi pat blong kastom mo kalja.”

Jif Viraleo Boborenvanua blong Pentecost we i bilif strong long kastom i talem se hemi no leit yet blong tijim ol skul pikinini long kastom mo kalja blong Vanuatu.

“I kat sam toktok se yumi lusum fulap long ol kastom mo kalja blong yumi mbe mi tink se i stap nomo,” Jif Boborenvanua i talem.

“Ol kastom writing blong yumi olsem ol sand drawing i stap nomo mbe yumi nomo i nid blong lanem bakeken.

“Long wei ia nomo yumi save divelopem mo groem wan gudfala pikinini long kastom mo kalja.”

Konfrens blong kastom mo education we i tekem ples, Ministry blong Education mo Training, Vanuatu Qualification Authority mo National University i organisem.