Kastom hemi stampa blong Vanuatu-Sato Kilman

Ol lida oli remindem pipol about impotens blong ol Jif mo kastom se hemi stampa blong Vanuatu.

Ol lida i serem sori from loss blong Jif Nakamal long Port Vila hemia afta we Malvatumauri Council blong ol Jif hemi endem mourning blong bigfala Nakamal blong ol jif long Port Vila long Wednesday wik ia.

Deputy Prime Minista, Sato Kilman hemi remindem pipol blong rispektem kastom oltaem.

“Kastom hemi stampa blong yumi; Kastom hemi wan pillar long Constitution blong yumi from yumi luksave impotens blong hem mo hemia nao kastom hemi fomem pat blong pillar blong mama loa. So hemi wan tabu samting,” Mr Kilman i talemaot.

“Eni man we hemi save kastom bae hemi save se hemi wan tabu samting. Haos we hemi bin bon daon, hemi wan all map blong independens blong Vanuatu, taem yumi stap tokbaot blong kasem fridom, wanem nao bae yumi mas mekem blong karem aot evri wok blong yumi. Ol jif oli luksave impotens se yumi mas kat wan bodi blong ol jif we oli save lukaotem ol nara jif raon long Vanuatu mo lon en blong dei lukaotem yumi evriwan long ol difren kastom. Yumi rij long kastom; Fes Presiden blong Malvatumauri, leit jif Willie Bongmatur wetem ol jif we oli stap wetem hem long taem ia oli mekem plante wok blong bildim nakamal ia.

Mr Kilman hemi mekem toktok tu mo kol long ol Otoriti se who eva we oli faenem se hemi mekem faea long Nakamal bai mas fesem strong panismen.

“Mi talem fes wan se yumi nosave wanem i bin mekem bilding hemi bon, sapos wan man i bonem daon mo yumi faenem aot, prea blong kavman se God blong yumi bae i givim maximum panismen long hu we i involv,” Mr Kilman i talem.

Long wik ia Chairman blong Malvatumauri Council blong ol Jif, Jif Willie Grey Plasuar wetem ol jif blong hem oli kam blong anounsem en blong serem kastom sori from loss blong bigfala haos ia.

Hae Jif Willy Grey Plasuar, hemi kol long ol long ol jif raon lo Vanuatu, kavman mo ol pipol blong kivhan blo bildim bak nakamal.

Fae i bin bonem daon long January 30 mo polis hemi stap investigatem yet kos blong faea.