Kavman bae i help long tabu-Erakor Lagun

Ol Jif long Erakor oli glad long Kavman from bae hemi help blong putum tabu long lagun.

Dipatmen blong Water Resource, i talem se instraksen blong ban o tabu long Erakor lagun i stap long State Law Ofis.

Jif Kalsaur Kalomtak Pomal VIII, i talem se faet blong presevem o kipim i klin solwota blong Erakor hemi bin stat long yia 1960 taem we wan bisnis man i bin disaed blong bildim tu artifisal aelan mo taem we oli bilitim sewage system blong Vila Central hospital.

“Fes mo namba tu lagun hemi no niu long Erakor blong tokbaut, taem ol projek ia oli bin stat i bin kat plante toktok folem wori se bae oli damejem lagun ia,” Jif Pomal VIII i talem.

“Tete pipol blong Erakor oli no benefit nating long tufala aelan ia mo no mata se ol otoriti oli bin promes se toti blong hospital bae i no ko long solwota mbe tete hemi polut bigwan.

“Blong plante yia mifala i bin mekem plante wok long own pawa blong mifala long saet blong kastom mbe Kavman i no even lukluk long ples ia.

Ol environmental expert oli faenem se tufala artifisal aelan i blokem klin wota long ocean i flow gud i kam long lagun, sewage system long Vila Central hospital i mekem se plante natural risos long solwata hemi lus mo i condaminate bigwan. I kat ol nara sos blong polution tu wei ko long solwata olsem sewage system blong ol bisnis long eria ia.

Long 2016 ol Erakor environment advocator we hemi tekem tugeta tu ol yut oli kerup blong tok from solwata mo kol blong ristorem bak solwota.

Oli bin toktok strong long past yia akensem tufala otoriti, kavman mo Jif, from we oli no wok blong protektem solwota.

Mbe tete i lukim se tufala i faenem wan wei blong wok tugeta.

Jif hemi bin putum wan Ban blong people i nomo yusum solwata blong faev yia long 2019, mo tete Kavman hemi stap kam in blong sapotem ban ia.

Paramount jif blong Erakor hemi talem tu se long wan visit blong Minister blong Water, Honoroble Edward Nalyal, long en blong last yia i ko long lagoon i bin pusum fowad ban ia blong tekem ples. Mo Minista i bin talem se ban hemi sud tekem ples bifo April long yia ia.

“Hemi no blong intrest blong yumi mbe hemi intrest blong pipol blong banem solwata kwiktaem mo yumi no tekem taem,” Jif Kalsaur Kalomtak Pomal VIII i talem.

Dipatmen blong Water Resource hemi bin faenem tru long ol test, sam yia ia pas finis, se wota blong Erakor lagun hemi doti mo hemi nogud blong pipol i yusum.

Solwota ia hemi mein sos blong kakae blong ol pipol long Erakor mo ol eria araon blong plante yia mo tete oli lusum plante gudfala marine risos ia.

Long January las yia ol pipol long lagun oli faenem ol ded fish long solwata mo i bin kontinu blong wan wik.

Deputy Director blong Coastal Fisheries long Department blong Fisheries, Sompert Gereva, hemi talem se hemi saen blong polution.

Wan parent long Erakor i talem se oli awea long polusen be plante time oli nogat choice from oli nogat work.

“Mifala i save se solwata i kat polusen be bai mifala i mekem wanem, plante long mifala i no wok mo mifala faenem kakae long solwata ia nao

“Plante gudfala kakae blong solwata i lus, sam taem mifala i ko faenem wan wan shell nomo o crap mo kukum blong fidim famili,” Elori Nimis i talem

I kat ripot tu se ol pikinini oli stap kasem ol rapis soa mo sikras. Mo plante taem oli mas rinjim gud olgeta afta we oli swim long solwota.

Naraside long sewage system blong Vila central Hospital i kat araon 100 pipol blong Tongoa we oli liv long eria blong 30 yia i pas finis, mo oli luk kwik jenj long enviroment blong solwota.

“Long past solwota hemi klia mo man i save diva blong faenem ol shell mbe tete yu no save luk wan samting nomo,” Jif Thompson Kalo blong komuniti ia i talem.

“Solwota hemi smel difren mo i nomo kat fulap fish olsem bifo blong mifala i save salem mo mekem mane lem,” Elo Nimis i talem

Minista blong Health, Honoroble Silas Bule, hemi bin talem long las yia se oli stap lukoutem funding long ol partner blong fixim sewage system blong Vila Central Hospital.

Mbe i bin kat wan tender hemi bin ko aot blong wan kwik ripea repair we hemi cost around 4million vatu, be from some issue long contract ia i mekem se work i no go hed yet, wan source hemi revealim.

Kasem tete Vila Central hospital i kontinu blong putum toti i ko long solwota.

Ol Jif oli talem se kavman ban long solwota bai hemi helpem jif blong stopem man blong no yusum solwota mo helpem blong stopem ol bisnis blong no putum waste i go long solwota.

Long wik ia ol jif blong Erakor oli stap kam tugeta blong tokbout wan tu yia plan blong ristorem bak solwota blong Erakor, wan consultasen bai i tekem ples long Thursday wik ia long vilij.

(Visited 139 times, 1 visits today)

About The Author

You might be interested in