Kavman bae i lukluk long lokol kwarentin kost

Kavman bae i wok wetem ol ol developmen patna blong pem kwarentin blong ol repatriates.

Hemi ansa we i kam long Deputy Prime Minista, Honoroble Ismael Kalsakau wetem Minista blong Finance mo Economic Management, Honoroble Johnny Koanapo, long 2021 Fes Extra Ordinary Sitting blong Palamen long tete moning.

Kavman i ansa blong talemaot se bae ol seasonal wokman i no nid blong pem kwarentin kost blong olgeta mbe bae kavman wetem ol developmen patna i lukluk blong kaverem ap ol kost ia.

Lida blong Opposition, Honoroble Ralph Regenvanu, i talemaot long social media se hemi wan gud nius afta we opposition i bin tok akensem disisen we i kamaot long National Disasta Komiti se hemi wan rong muv.

VBTC Nius i andastand se bae Kavman i pem kwarentin blong ol repatriates we oli aot long kwarentin long wiken ia.

Wan kavman sos i talem long VBTC Nius, se ol grup blong ol wokman we oli pat long Seasonal Workers Program long Australia ia, Kavman blong Australia i kat wan spesel arenjmen wetem Vanuatu kavman blong oli no pem kwarentin.

Hemi talem se kavman bae i jes pem kwarentin blong olgeta wokman ia from oli no bin awea se bae oli pem kwarentin taem oli stap kambak long kaontri.

Wan seasonal wokman blong Australia we oli jes aot long kwarentin long Sunday ia, we i no wantem nem blong i kamaot i talem long VBTC Nius long eli wik ia, se oli i glad from oli no spendem VT127,000 blong pem kwarentin blong 14 dei.

Hemi talem se hemi wan gudfala filing taem oli kamaot mo oli no wari blong pem kwarentin.

Seasonal wokman ia i talem se kavman i talem long olgeta se olgeta nao ol las grup we bae oli no pem kwarentin.

“Mifala i bin resem arem nogud blong mifala long kavman taem mifala i stap long kwarentin se i no stret nomo blong oli jajem mifala bakeken,” hemi talem.

“Mani ia yumi save yusum blong helpem famili long had taem naoia we mani i no ron gud long kaontri.”

Sam Recognised Seasonal Employer blong Vanuatu long New Zealand, i bin stap komen long social media se hemia i no fea taem ol grup blong ol grup blong repatriates ia oli no pem kwarentin mbe bae olgeta i kambak mo pem.

Mbe oli talem tankiu long kavman long niu muv ia.

Seasonal wokman we i jes aot long kwarentin i talem tankiu long kavman.

“Mi askem kavman blong mekem i fea; lukluk long sam nara opsen blong mekem praes blong ol kwarentin fasiliti ia i ko daon nomo o askem ol patna fren blong Vanuatu blong help,” hemi talem.

Mbe spokesepersen blong COVID-19, Russel Tamata, i bin talem long VBTC Nius se kavman i nosave kontinu blong pem kwarentin blong ol repatriates from kavman i nogat enough mane.

Totol kost blong estimate 60 Ni- Vanuatu wokman we oli pat long Seasonal Workers Program long Australia we oli aot long kwarentin long wik ia i kasem ova VT 7million.

Lida blong Opposition, Honoroble Regenvanu, i bin talem se long kes blong ol Vanuatu Kavman Sponsor studen, 99 per cent oli sponsor tru long kavman mo hem yet bae i lukluk long kwarentin kost blong olgeta.
Plante seasonal wokman ovasi i glad long muv we kavman i mekem mo talem bigfala tankiu.

 

 

 

 

 

(Visited 1052 times, 1 visits today)

About The Author

You might be interested in