Kavman bae i spend moa long coconut beetle

Vanuatu i no bin save priventem spred blong Coconut Rhinoceros Beetle long North West Efate.

Ministry blong Biosecurity Director General, Moses Amos, i talem se wael tim i stap fokas bigwan long biological control, beetle ia i bin spred i ko long Mele eria tru long transpot.

“Afta long en blong State blong Emergency long North West Efate, bigfala fokas hemi long biological control blong beetle ia i no spred i ko moa long plesia, mbe oli faenem se beetle ia i spred tru long transpot,” Mr Amos talem.

Hemi talem se Kavman i bin spendem ova VT23 million blong controlem beetle ia long spred blong hem long North West Efate.

Hemi talem se, “Proces blong karemaot o kilim ded everi beetle i ko long zero hemi no isi.”

Hemi talem se wan fokas blong olgeta i blong destroem ol breeding ples we ol beetle ia i stap long hem, blong mekem se namba blong ol beetle ia i ko daon mo afta long hem oli save yusum biological control.

“Mbe bae i no oltaem yumi kilim ded everi wan, bae i olwes kat wan woman beetle we i survive mo i flae aot i ko putum egg samples mo populatem wan nara eria,” hem i talem.

Mr Amos i talem se Ministry blong Biosecurity i tink se kliff o hill blong Mangaliliu vilij bae hemi wan natural barrier we i no save alawem bettle ia blong flae ova.

Hemi talem se, “Bae hemi wan nara cost bakeken long Kavman long operesen long Mele eria.”

Bill Garae, Acting Assistant Plant Health Ofisa, i talem se Ministry blong Biosecurity bae hemi wok nomo wetem semak tim mo bae oli ekstentem ol mesa long Mangaliliu kasem long Mele.

Hemi talem se semak mesa nomo we oli mekem long Mangaliliu bae i stap long Mele.

“Wan jalens nomo we mifala i stap fesem hemi long Mele kasem sam eria long Bukura, i kat plante difren propeti ona mo hem ia bae hemi hard,” Mr Garae i talem.

“Long eria blong Mangaliliu, hemi wan vilij mo i kat wan jif nomo we i givim ful raet blong tim i wok.”

Ministri i stap askem ol coconut fama blong tekem responsibiliti blong klinim ol plantation blong olgeta olsem pat blong sanitation program we tim i stap enkarejem.

Coconut Rhinoceros Beetle i stap naoia long wan risk eria we i kat isi akses blong ol transpot olsem ship o truck we bettle ia i save ko long olgeta mo muv i ko long ol nara eria.

Ministri hemi stap wok wetem Kavman blong New Zealand blong kontrolem spred ia.

 

 

 

 

 

 

 

 

 

(Visited 577 times, 1 visits today)

You might be interested in