Kavman i askem ol agent blong mekem gud wok

Kavman i kivim yia ia long ol agent blong pruvum se wok blong sendem ol pipol i ko wok long ol fam ovasi i mas fea mo transparent.

Minister blong Internal Affairs, Honoroble Ismael Kalsakau Maaukoro, i talem se kavman i mekem disisen ia long miting blong Council blong Mininster long Lakatoro, Malekula long las yia.

Hemi talem se kavman i tekem disisen ia from i kat tumas komplen long ol seasonal wokman se sam agent i stap askem tumas mani mo oli no fea long ol seleksen.

“Mi wantem kivim benefit ia blong ol agent i soem long kavman se wan, oli no stilim ol pipol blong yumi mo tu, proses blong seleksen i mas fea mo transparent,” Minister Kalsaukau i talem.

“Plante agent long kaontri oli stap mekem gudfala wok mo sapos oli pruvum se oli no stilim ol wokman mo tufala pati i hapi, bae mi save askem Council blong ol Minister blong lukluk bak long disisen ia.

“Kavman i mas step insaed long scheme ia blong stretem plante samting.”

Plante agent oli bin tok akensem disisen blong Kavman blong hemi tek ova long rikruitmen blong ol seasonal wokman.

Oli talem se wok we oli stap mekem hemi stret vinis from ol dil direk wetem ol fama mo oli save gud ol wokman we oli smart mo save wok gud long ol fam.

Minista Kalsakau i talem se disisen ia i blong benifitem evri wan long Labour Mobility Scheme.

Hemi talem se plante pipol oli soem intres blong ko wok ovasi from oli fil se hemi wan gudfala opotuniti blong mekem mani mo helpem famili.

“Yu luk ol namba we Labour Dipatmen i bin rigista long Pacific Labour Scheme hemi ova 2000 mo hemia i wan bigfala namba from plante pipol oli save se yes mi save ko wok, bae oli jusum mi mo i no from mi vot long wan persen mbe from mi wan Ni-Vanuatu,” hemi talem.

“Hemia hemi stret wei we yumi wantem wok folem.

“Labour dipatmen i stap setem ap wan unit naoia blong dil wetem database blong ol wokman mo yumi.

“Mi glad long gudfala wok we Labour dipatmen i stap mekem.”