Kavman i askem proteksen long mama language

Hed blong Kavman i kol blong pipol i mas kat rispek long ol mama language blong olgeta.

Honoroble Bob Loughman i talem se pipol i mas kipim 113 difren langwis.

“Nation blong yumi i kat tri ofisol language we hemi Bislama, English mo Franis mbe yumi kat ova long wan handred lokol language,” Prime Minister Loughman i talem.

“Yumi glad tumas blong gat bigfala daevesiti blong language long kaontri blong yumi from hemi soem kalja blong Vanuatu.

“Ministri blong mi, we i lukaotem language afea long Vanuatu, naoia i traem blong faenem ol wei blong wok moa long eria ia we Cultural Center blong Vanuatu, Malvatumauri Council blong ol Jif wetem Vanuatu Christian Council i stap mekem finis blong protektem, holdem taet mo promotem ol mama language blong wan wan aelan blong Vanuatu.”

Presiden blong Malvatumauri Council blong ol Jif, Jif Grey Willie Plasua, i talem se long kastom lukluk, kastom language i olsem wan rop we i fasem impotens blong kastom mo tradisen.

Hemi talem se from hemia, Malvatumauri i kol blong ol papa mo mama i mas tijim ol pikinini blong olgeta long ol mama language blong ol aelan we oli kamaot long hem.

“Sapos wan pikinini i no save mama language blong hem hemi minim se hemi nosave identity blong hem,” Jif Plasua i talem.

Prime Minister Loughman i talem se tete fulap language ia i lus mo sam oli stap lus slow slow.

Ol toktok ia, Prime Minister mo President blong Malvatumauri i mekem long International Mother Language Day long Port Vila.

 

(Visited 77 times, 1 visits today)

About The Author

You might be interested in