Kavman i katem daon praes blong wok permit

Ol bisnis haos i stat pem work permit fi long VT 180.000 long wik ia.

Work Permit fi i bin stap long VT 350,000 fastaem mbe wetem strakol we ol bisnis haos i stap fesem blong mekem vatu, kavman i disaed blong katem daon long manis ia April.

Minista blong Internal Affairs, Honoroble Ismael Kalsakau, i talem se hemia i blong helpem ol bisnis owna long taem naoia we Wol i stap long pandemic blong COVID.

Long signing blong oda ia , Minista Kalsakau i talem se oda ia bai i kam efektiv long wik ia nomo afta we State Law Ofis bai i kasetem.

Minista Kalsakau i talem se praes kat daon ia hemi blong helpem kavman tu blong karem in ol forena blong kam finisim ol projek blong kavman.

“Wok permit we i stap long VT 350, 000 i ko daon long VT 180,000 long wan yia,” Minista Kalsakau i talem.

“Hemia i blong Kavman i givim smol break long ol private sekta bisnis blong bae oli save mekem wok mo atraktem investmen blong i kam insaed long kaontri.

“Mo tu blong bringim in ol pipol we oli save help mekem wok fos blong yumi i kam ap gud; kriatem pul blong ol wok pipol we bae oli moa professional long ol yia we i stap kam.”

Jeaman blong Vanuatu Chamber blong Commerce mo Industry, Antoine Boudier, i talem tankiu long kavman from disisen ia.

“Mi asurem se kavman se wetem muv blong rivisem ol fi blong bisnis laesens, wok permit mo motifyem ol reserve list bae i truli bildim konfidens.

Mi tingse hemia nao bae ol bisnis pipol oli save bildim capaciti blong olgeta mo tu inkrisim revenue blong kavman.”

Commissioner blong Labour, Murielle Metsan Meltenoven, i talem se wetem janis we kavman i mekem, ol private sector oli mas rispektem ol laba law we i stap.

“Naoia bae mifala i luk fowod blong wok in panaship wetem chamber, blong yumi save implementem ol niufala jens ia,” Mrs Meltenoven i talem.

“Mi stap apil strong i kam long yumi long chamber, sapos yumi save toktok wetem ol memba blong oli kontinu blong komplae mo observem ol laba loa we i stap.”

Chief Executiv Ofisa blong Vanuatu Investment Promotion Authority, Howard Aru, i talem se i gat ova long 300 work permit we i stap wetem hem long ofis naoia.

“So far, long ripot we i stap tete, yumi gat 350 wok permit, insaed long ol kampani i gat samples long seven thousand; Mo totol employmen blong Ni- Vanuatu hemi ova long six thousand mo hemia long Vila nomo. Long Santo namba i save inkris i ko long eight thousand,” Mr Aru i talem.

Minista Kalsakau i talem se kavman i save reviewem mo jenis hemia bakeken long ol taem we i stap kam taem situasen blong COVID-19 i ko daon.

(Visited 197 times, 1 visits today)

About The Author

You might be interested in