Kavman i kivim wan-handred million vatu blong census

Vanuatu Kavman i putum VT100 million i ko long Vanuatu National Statistics Office blong i save karem aot gud nasenal populeson mo haosing senses long manis Novemba.

Coordinator blong 2020 National Population mo Housing Census, Jimmy Tamkela, i talem se ol data we bambae oli kolektem bae i helpem Kavman bikwan blong mekem ol divelopmen or respon gud long ol pipol afta long najerol disasta.

Hem i talem se oli statem off ol planning blong census vinis.

“Mi wantem talem tankiu long European Union tru long EDF11 we hem i save kam in blong hem i provaedem VT50 million i kam long census blong mifala i save lukluk long saed blong pablisiti wetem ol Information Communication mo Technology ekwipmen blong census we bae mifala i yusum,” Mr Tamkela i talem.

“Mo United Nations Population Fund i kam in wetem VT10 million blong helpem mifala blong mifala i trialem aot kwestenea blong census afta mifala i save ajastem mo mekem ol jenis long hem. So trifala okanaesesen ia oli kam in bigwan mbe bigfala portion nao hem i kam long Vanuatu Kavman so hem ia hem i indiketem nomo se kavman hem i rili wantem. Hem i rili wantem blong census ia hem i hapen blong i helpem hem long ol fiuja plan blong hem.”

Charlinton Leo, Manager blong Social mo Environment long ofis blong statistics i talem se hem i impoten blong pipol i mas wok tugeta wetem tim blong olketa taem oli ko long eria blong olketa.

Hem i talem se oli bin rikrutum 950 enumerator we bae oli wok long nasonal census ia. Long namba ia bae i gat 750 we oli ol intaviua, olgeta we oli ko long fil blong intavium ol haushol.

“Mo bae yumi gat 150 fil supavisa, ol supavisa oli stap long fil blong supavisem ol fil woka ia. Mo bae i gat 50 hedkwota supavisa, olgeta ia bae oli bes long Vila, blong supavisem ol fil supavisa we oli stap long fil,” Mr Leo i talem.

Hem i talem se oli putum tri difren level ia blong enumeration fil wok hem i blong help tu blong mekem kwestenea jek taem ol fil intaviua oli stap yet long fil.

(Visited 43 times, 1 visits today)

About The Author

You might be interested in