Kavman i kleim se infomesen blong pablik akaons i no tru

Kavman i talem se infomesen we Public Accounts Committee i rilisim abaot tu bank i pul aot long National Bank blong Vanuatu from mani laundering mo citizenship hemi no tru.

Minister blong Finance mo Economic Management, Johnny Koanapo, i talem se ol infomesen we Public Accounts Committee i rilisim long wik ia hemi wan misinfomesen mo pablik i no sud harem.

Public Accounts Committee i bin ripotem se tufala bank, Westpac mo National Bank blong Australia, i nomo wantem mekem bisnis wetem National Bank blong Vanuatu from tufala i luk potential brij long anti money laundering wetem sale blong citizenship program.

Mbe Minister Koanapo i talem se infomesen ia i no tru mo isiu blong corresponding bank i no ko inlaen wetem program blong citizenship.

Hemi talem se statemen we Jeaman blong Public Accounts Committee i mekem bae i afektem inkam mo revenui blong National Bank blong Vanuatu.

“Public Accounts Committee oli kat janis blong oli arem ol infomesen mo sabmisen bes long ol rikwes blong olketa long ol difren institutions olsem National Bank blong Vanuatu mo ol nara ofisiol we oli ko givim ol infomasen ia,” Minister Koanapo i talem.

“Mbe infomesen ia i no stret blong ko aot long pablik kasem taem Palamen i lukluk long finol ripot blong komiti.

“Infomesen we i rilis i save kriatem panik long olgeta bank espesili ol klient blong National Bank blong Vanuatu.”

Minister Koanapo i talem se ol lida oli no mas yusum ol kaen infomesen olsem blong gainem political sapot.

“Corresponding banking isu hemi nokat eni koneksen nating wetem paspot isiu so hem ia hemi wan misinfomesen,” hemi talem.

Jeaman blong Public Accounts Committee, Matai Seremaiah, i talem se folem inkwaeri we oli bin mekem i soem se tufala bank ia i bin givim notis finis long National Bank blong Vanuatu blong tufala i pulaot olsem ol correspondent bank.

Hemi talem se Westpac i pulaot nomo from i gat lukluk se citizenship program i gat hae risk blong save brijim ol anti mani laundering loa.

“Nao inkwaeri blong mifala i ko long level ia from olsem mi talem finis fokas blong kavman hemi gat VT9 billion estimet we oli putum long revenui generation from citizenship program we bai i kam in long budget blong nekis yia,” Mr Seremaiah i talem.

“Mo wetem notis blong Westpac mo National Bank blong Australia, hemi putum kwesten se weta long nekis yia yumi save kolektem revenui long citizenship.

“Taem ol corresponding bank oli stop blong akt i minim se mani long prokram blong citizenship i no save kam insaed.

“Oli luk ol seves we i gat potential risk, oli stap katem aot from Westpac bank hemi jes pem faen blong AUD 1.3 billion from hemi brekem anti money laundering act.”

Mr Seremaiah i talem se wetem muv blong tufala bank ia, i save gat nekatif impak long nasonal budget blong kavman we i stap go long Palamen.

“Hem ia from citizenship program i kontribute bikwan long national budget,” hemi talem.

Governor blong Reserve Bank, Simeon Athy, i talem se National Bank blong Vanuatu i stap wok had naoia blong faenem ol nara corresponding bank blong dil wetem mani blong citizenship bifo i entarem kaontri.

Governor Athy i talem se Reserve Bank blong Vanuatu bai i help blong mekem sapot statemen long eni bank we i wiling blong mekem bisnis wetem National Bank blong Vanuatu.

Sins long January i kam, Ofis blong Citizenship i mekem finis VT 8.9 billion long program ia mbe plan blong kavman hemi blong mekem VT9 billion.

VBTC i no bin save  kasem wan respon long jeaman blong Citizenship from hemi no bin availabol.

(Visited 420 times, 1 visits today)

About The Author

You might be interested in