Kavman i lukluk long tuna indastri

Vanuatu i wantem impruvum tuna fisheri divelopmen mo manejem plan blong hem.

Director blong Fisheries Department, William Naviti, i talem se dipatmen blong fisheries i holem wan miting long wik ia blong adresem tuna indastri long kaontri.

Hemi talem se Vanuatu i wantem joinem ol narafala kaontri long rijen blong kam antap wetem wan sastenebol fisheri.

“ Wokshop i blong lukluk bak long rivaes tunamen manejmen plan blong 2014,” Mr Naiviti i talem.

“I kat fulap divelopmen i tekem ples long kavman polisi mo long saed blong manejmen i gat ol niu teknoloji i introdius blong help manejem gud tuna fish.

“Fishing indastri i wantem inpruv long wok blong hem mo kavman i mas provaedem wan plan long manejmen mo divelopmen tuna long wan fasen we i balens.

“Vanuatu i stap adoptem ol niu wei blong kajem fish mo i impoten blong kavman i mas kamap wetem ol fremwok blong sefgadem oltaem.”

Director General long Ministry blong Fisheries, Moses Amos, i talem se kavman i wantem se dipatmen blong fisheries i mas mitim evri potensol blong hem blong save mekem mani long kaontri.

“ Vanuatu i gat bigfala potensiol long solwora blong hem kompea long graon, even ol risos blong hem pipol i no fitim semak long agrikalja we man i mas planem mo lukaotem,” hemi talem.

” Ministry blong fisheries i mas kat blong mekem se Vanuatu i yusum ol marine risos blong hem.”

Mr Naviti i talem se ”Vanuatu i gat 70 rejista ship we oli yusum blong stap fishing long hem mo oli pem wan laesens blong VT 3 million blong lukaotem tuna long wan yia.

“ Kavman i wantem jajem ol ship ia long wan manis mo afta bae hemi go long dei jaj long fiuja blong mekem moa mani long tuna fish,” hemi talem.

Long rikod, Vanuatu hemi kasem 15 taosen medrics tan blong tuna evri yia mo 10 taosen hemi blong albaco tuna nomo.

(Visited 134 times, 1 visits today)

About The Author

You might be interested in