Kavman i no rulum aot lokdaon

Health otoriti oli no rulum aot tingting blong lokdaon long next wik bambae i save hapen sapos virus i kontinu blong inkris.

Long adres blong hem tete long national TV, Health Minista, Bruno Leingkone i expresem konsen blong kavman long inkris namba blong ol pipol we oli kat COVID.

“Taem yumi washem hand blong yumi wetem sop mo pratisim social disten hemi stopem spread blong virus mbe mi sori blong luk se ol simpol rul, pipol i no folem,” Minista Leingkone i talem.

“I mekem se ol kes long Vila mo Santo i ko hed blong ko antap.

“Hemi impoten blong rispektem ol rul taem pipol i ko wok o ko long sto. Ol atitude(Fasen) olsem i no mekem eni jens blong daonem sik ia.”

Minista Leingkone i anaosem se bae oli lukluk long situasen ia mo putum sam moa strik rul.

“Mi wantem askem long yumi evriwan long Efate mo Ofshoa aelan mo Sanma Provins blong pripea,” Minista Leingkone i talem.

“Hemia sapos i kat wan lokdaon. Mbe tinktink ia i dipen long muvmen blong pipol long wiken ia.”

Ol statistics we Health Minista Leingkone i rilisim long tete i talemaot inkris blong sik ia.

Long Monday wik ia, long Santo mo Vila, 20 kes. Long Tuesday 59. Long Wednesday 69. Long Thursday 70.

Totol kes long Monday hemi 259. Long Tuesday 341. Long Wednesday 356 mo long Thursday 473.

Ol Health care wokman we oli tes positiv hemi 35. Ol franlaen wokman hemi 14 staff.

Minista Leingkone i talem se averej kes ripot long wik ia, hemi 45 sikman long wan dei.

Tri man i admit long hospital mo wan i long critikol kondisen(sik bigwan).

Minista Leingkone i talem se i nokat eni ded blong COVID.

 

 

(Visited 1145 times, 1 visits today)

About The Author

You might be interested in