Kavman i plan from moa repatriation long September

Spokesperson blong National Advisory Committee blong COVID-19, i talem se, Kavman wetem ol foren misen ova sea oli stap planem blong i kat sam moa repatriation long manis September.

Len Tarivonda i talem se, Ministry blong Health hemi apruvum vinis wan repatriation protocol we Air Vanuatu hemi priperem.

Hemi talem se, naoia hemi stap long National Disaster Management Office mo Ministry blong Foreign Affairs blong oli setemap ol deit blong repatriation ia.

“Nasenol COVID- 19 Advisory committee hemi apruvun finis wan jata flaet blong Air Vanuatu i ko long Christchurch, New Zealand blong pikimap ol Recognised Seasonal Employee wokman blong Vanuatu,” Mr Tarivonda i talem.

” Long namba 11 mo 12 September bae Air Vanuatu i mekem ol jata flaet ia mo tu komiti i apruvum vinis wan wikli schedule blong ol cargo flaet blong Air Vanuatu.

“Olgeta Flaet ia bae i ko long Auckland, Brisbane, Noumea mo Nadi stat long manis ia, Septemba kasem long December yia ia.

Mr Tarivonda i talem se, “Olgeta dei blong flaet hemi long Wednesday, flaet i ko long Auckland, New Zealand, Saturday flaet i ko long Brisbane, Australia, Fiji, Nadi long Monday mo Noumea long olgeta Thursday.”

Hemi talem se fesfala flaet i ko long Brisbane bae hemi hapen long Saturday ia, namba 5 September.

Spokespersen blong COVID-19 i talem se, i kat 139 national mo residen oli bin kambak long Vanuatu folem seken repatriation long manis August.

Len Tarivonda, i talem se, aot long nmba ia, bigfala namba nao hemi ol Recognised Seasonal Employee wokman blong Vanuatu we oli kam long New Zealand.

Hemi talem se, i gat faev flaet long seken phase blong repatriation we i kam long Samoa, New Caledonia, New Zealand mo Solomon Islands.

“ So far yumi tekem in i kam insaed long kaontri 139 nationals mo residens, mo seven oli bin rilis vinis long ol kwerentin faciliti.

“ I kat 118 pipol we oli kam long New Zealand, tu long Noumea, faev long Samoa, eight long Solomon Islands mo six long France we oli kam ova naet long New Caledonia mo kam long kaontri,” Mr Tarivonda i talem.

“ Long wednesdei wik ia, bambae i kat 118 pipol we oli kam long flaet blong New Zealand bae oli kamoat long kwarentin.

“ Ol famili blong leit High Commisioner blong Vanuatu long New Zealand, Johnson Naviti bae oli aot nao blong save putum gud bodi blong hem.”

Vanuatu hemi gohed blong flyem flag half mast sins hemi ded long New Zealand mo bae kavman i jes mekem wan funeral long wik ia.

Mr Tarivonda i talem se long ol ripot we oli risivim konsenem ol repatriates ia hemi se everi wan i stabol we i minim se i nokat wan i kasem ol sign blong sik ia Coronavirus.

Hemi talem se sapos 118 pipol i kamaot long kwarentin tumoro, bae 14 pipol i stap yet long kwarentin.

“ I kat wan jata flaet long Monday morning we Kavman blong Franis i mekem hemi kam wetem ol diplomat blong France Embassy,” Mr Tarivonda i talem.

“Mo flaet ia i karem nomo six pasenja we oli bin travel out long Franis i kam long New Caledonia long wiken we i pas, mo long morning oli aot long New Caledonia mo kam long Vanuatu.

“ I kat faev big man, mo wan smol bebe boy blong kam tekem ap diplomatic post blong riplacem tim we i bin leko kaontri i no longtaem i pas.

 

(Visited 91 times, 1 visits today)

About The Author

You might be interested in