Kavman i enfosem pandemic plan blong hem

Vanuatu i enfosem pandemic prepareness plan blong hem folem spread blong COVID-19 long wol.

Director blong Public Health, Len Tarivonda i talem se plan i stap longtaem vinis mo i stap anda long Dipatmen ia, mo wetem situasen blong COVID- 19 ia, bae i kat lukluk mo wok folem wanem we oli stap mekem blong respons long situasen blong COVID-19.

Mr Tarivonda i talem se global pandemic blong COVID- 19 i jalenjem plante kaontri long wol wetem ol plan we oli kat long saed blong virus ia.

Hemi talem se Vanuatu i still stap olsem wan COVID-19 fri nesen, mo kaontri i bin lanem fulap samting aot long global crisis ia.

“Long Ministry blong Health yumi kat wan plan we i bin stap blong vinis mo yumi no bin lukluk tumas long hem from nomo se yumi nokat wan pandemic o spread blong wan niu sik,” Mr Tarivonda i talem.

“Yumi kat ol smolsmol outbreak o epidemic blong ol sik mbe nawia we COVID-19 i kam, hemi tijim yumi wan lessen se blong prepare hemi key.

Hemi talem se afta COVID-19 pandemic ia, bai Ministry blong Health bai i putum tugeta wan update pandemic prepare plan we bai kavman i folem long eni futja sik.

“Naoia yumi stap usem Public Health Act blong 1993 we i olfala lelebet, mo usum ol provision olsem kwarentin,”

“Mbe bai i kat wok tu blong lukluk bak long loa ia.”