Kavman i putum mani long agriculture

Council blong ol Minister  i apruvum VT 300 Million long manis ia blong sapotem sekta blong Agriculture.

Press Ofisa blong Ministry blong Finance mo Economic Management, Gordon Narnhambat,  i talem se disisen ia Council blong ol Minister i mekem folem fokas blong Kavman naoia blong lukluk moa long sekta blong Agriculture olsem prodaktiv sekta.

Hemi talem se VT 300 million ia bae oli divaedem i ko long ol difren prodak blong agriculture.

“ Mani ia, VT 150 million bae i ko blong sapotem copra nomo,” Mr Narnhambat i talem.

“ Mo nara VT 150 million bae i ko blong sapotem ol nara agriculture prodak olsem cocoa, kava mo ol nara cash crop mo wan niu wan nao hemi ol kakae olsem taro, yam, manioc we yumi stap planem.”

Director blong Department blong Agriculture, Antoine Ravo, i talem thankiu long kavman blong luk save agriculture olsem prodaktiv sekta blong givim mani blong sapotem.

“ Olsem director risponsibol long agriculture hemi wok blong department blong mas kontinu blong sapotem rural prodaksen blong mekem i gro moa,” hemi talem.

Mr Narnhambat i talem se blong ol lokol expota i save kasem mani ia hemi tru long ol laisens we oli kat vinis i stap.

Hemi talem se oli save kat akses long hem taem oli dil wetem olketa long Department blong Trade mo taem everi pepa i stret, Department blong Trade bae i konfemem long Department blong Finance mo bae oli rilisim mani long ol lokol expota ia.

Praes blong copra naoia bambae i go antap long VT 40,000 long wan tan kompea long ol pas yia.

(Visited 38 times, 1 visits today)

About The Author

You might be interested in