Kavman i sapotem ifira handicraft

Kavman i givim ova VT10 million long ol mama blong Sikotau Handicraft long Island blong Ifira long eli December.

Eighty Faev mama oli sherem mani ia olsem stimulus sapot.

Chairlady blong Sikotau Handicraft, Saki Sope, i talem se mani ia bambae emi helpem sustainabiliti blong bisnis blong hem.

“Hemi tekem ova fo manis blong kavman emi respon blong givim mani ia blong sapotem mifala long had taem ia,” Mrs Sope i talem.

“Mifala i patient nomo from mifala save se bambae i kat stret taem bae mani i kam we hemi tete.

“Mani ia bambae i helpem mifala long operation blong bisnis blong mifala, smolsmol nid blong haos mo tu skul fi blong ol pikinini we i stap kam nekis yia.

“Laswan talem tankio long kavman blong luksave krae blong mifala.”

National Coordinator Handicraft, Nadia Kanegai, i talem se finance i stap prosesem seken paymen blong olgeta mama anda long Sikotau Handicraft we oli no risivim paymen blong olgeta yet.

Hemi talem se seken paymen bambae hemi VT aroan 13 million.

“Kavman blong Vanuatu i luk save nid blong ol pipol blong hem long taem blong COVID -19 pandemic, we i stap afektem wol tete, espeseli handicraft long Vanuatu we oli rely bigwan long tourism,”Mrs Kanegai i talem.

“Ol mama oli kontribut bigwan tu long economi blong Vanuatu.”

I kat 198 mama evri wan wan oli rijista anda long Sikotau Handicraft, aot long namba ia 85 i tekem festaem grant blong olgeta. Wan mama i risivim VT 120,000. I tekem wan totol blong VT24 million we Kavman i givim i ko long asosiasen.

Mrs Kanagai i enkarejem ol nara bisnis blong rigisterem licens blong bisnis blong save pat long ol program olsem we kavman emi stap givim i ko daon long ol pipol.

 

 

(Visited 633 times, 1 visits today)

About The Author

You might be interested in