Kavman i tekem sinopharm vaccine

Prime Minista blong Vanuatu i fes man blong tekem sinopharm vaccine long wik ia.

Honoroble Bob Loughman i fes man blong tekem vaccine ia we Chinese Government nao i kivim i kam long Vanuatu mo hem i wan long olgeta vaccine we World Health Organisation i bin apruvum blong pipol i save tekem.

Prime Minista Loughman i talem se hemi tekem vaccine ia blong soem se hemi sef mo efektiv blong faet akensem virus blong COVID-19.

Hemi talem sinopharm vaccine hemi seken COVID-19 vaccine we i kam long Vanuatu.

“Mi disaed blong step fowod blong tekem feswan,” Prime Minista Loughman i talem.

“Hemi blong kivim kamfot long evri wan long Vanuatu stat long saot kasem not.

“Taem yumi wantem impruv long ekonomik aktiviti blong yumi; COVID i kam blong stap long Wol mo sapos yumi wantem kobak long nomol bisnis bakeken olsem bifo, yumi evri wan i mas kam tekem stik meresin blong protektem yumi.

“Mo yumi alaowem ol nara fren blong kam.”

Wan Chinese national we i no wantem talem aot nem blong hem, i talem se Ministry blong Health i mekem wan gud wok long saed blong rolemaot ol COVID-19 vaccine long Convention Center long Port Vila.

Hemi talem tankiu from Kavman blong Vanuatu i save inkludum ol Chinese national blong tekem vaccine mo stap sef.

Prime Minista Loughman i enkarejem ol komuniti lida blong invitem ol pipol blong olgeta blong mas tekem COVID-19 vaccine.

Hemi talem se vaccine blong COVID-19 hemi no compulsari mbe pipol i mas lisen long ol awenes toktok we Ministry blong Health i talem mo mekem disisen.

“Vaccine ia hemi semak long ol nara stik meresin we yumi bin tekem vinis blong yumi no sik,” Prime Minista Loughman i talem.

“Ol nara stik meresin olsem polio mo measles.”

I kat tri nara minista tu i tekem stik meresin ia, Minista blong Finance mo Economic Management,Honoroble Johnny Koanapo, Minista blong Justice mo Community Services, Honoroble Esmon Saimon, Minista blong Trade, Tourism mo Ni-Vanuatu Business, Honoroble James Bule mo Chinese Ambassador blong Vanuatu. Zhou Haicheng.

Lonjing blong sinopharm vaccination ia i tekem ples long Tuesday wik ia, wetem ova 100 pipol i kasem stik meresin.

Kavman i hop blong rolemaot sinopharm vaccine long nekis wik.