Kavman online seves atak i stap long investikesen

Vanuatu Computer Emergency Response Team i stap investiketem sam hacker we oli bin atakem online seves blong Kavman long wik ia.

Cyber Security Technical Advisor blong Computer Emergency Response Team, Jeff Garae, i talem se aktiviti blong atak i bin hapen long Tuesday wik ia long 1 o’clok long aftanun.

Hemi talem se online atak ia i bin blokem sam impoten website blong kavman long kaontri.

“National Computer Emergency Response Team i biliv se ol aktiviti blong online atak long ol kavman network i kam aot long ol set ap crime krup ,” Mr Garae i talem.

“Krup ia i bin mekem semak atak long sam nara kaontri long semak taem long Tuesday.

“Ol Hacker ia oli bin ko insaed long core serva blong kavman internet mo oli bin blockem 20 website blong kavman long kaontri.

“Mifala i save ditektem kwiktaem nomo ol pipol we oli ko online mo mekem fasen ia long sem dei we i hapen mbe from i nokat enaf risos.

“Sapos yumi kat propa risos mo ol ril taem alert monita bae yumi save faenem ol pipol ia ariap nomo.”

Mr Garae i talem se i tekem 20 hoa blong oli save rispon blong putum bak ol website blong kavman ia .

Mbe hemi wori se bae aktiviti blong online atak ia i save hapen bakeken.

Deputy Chief Information Ofisa long Ofis blong Government Chief Information Officer, John Jack, i talem se online atak long ol seves blong kavman blong Vanuatu hemi wan serious atak long kaontri.

Hemi talem se National Computer Emergency Response Team i bin wok had blong putum bak ol kavman website ia.

“Online Internet atak ia hemi wan International atak mbe yumi nosave konfemem yet se hemi kamaot long wanem kaontri,” Mr Jack i talem.

“Yumi mas faenem aot se long taem we oli bin ol aktiviti ia,  sam infomesen blong kavman i bin aot o nokat.

“Mi mas talem se hemi wan jalenj blong yumi long Vanuatu from i nokat ol risos blong lukluk long ol kaen isu olsem.”

Mr Garae i mekem wan strong apil i ko long evri kavman stakholda blong oli mas tekem ol strong Cyber Security praktis blong katem daon ol janis blong wan nara atak bakeken.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

(Visited 1007 times, 1 visits today)

About The Author

You might be interested in