Kawenu Primary skul i kat niu klasrum

Araon 80 skul pikinini bae i kat akses blong save lan insaed long wan niufala klasrum blong Kawenu Primary School.

Thelma Joel, Headmistres blong Kawenu Primary skul, i talem se hemi glad tumas from niufala bilding ia bae i save tekem 40 studen long wan rum.

Hemi talem se klasrum we oli ribildim ia, hemi bin distroe long taem blong Saeklon Pam long 2015.

“Klasrum we i distroe ia hemi blong klas faev mo six, mo oli bin stap yusum skul hall blong stap skul long hem,” Mrs Joel i talem.

“Mifala i bin askem tu klasrum long Vanuatu Teachers College blong save yusum blong tijim ol skul pikinini long hem.

“Mo naoia mi klad tumas from niufala bilding ia bae ol pikinini oli stap ko insaed long hem mo lan mo tu hemi save stanap long taem blong cyclone from hemi wan strong bilding.”

Dorothy Hamish, Senior Project Ofisa blong Vanuatu Infrastructure Reconstruction mo Improvement Project, anda long Ministry blong Infrastructure mo Public Utilities i talem se mani blong bildim niufala klasrum ia hemi VT 49,889,820 mo World Bank nao i fundem.

Hemi talem se Pierre Brunet Entreprise Generale nao i kasem awod blong bild long Kawenu Primary skul long 2019 mo long September yia ia, hemi komplit.

“Wok blong Vanuatu Infrastructure Reconstruction mo Improvement Project hemi blong mekem sua se hemi bildim bak mo impruvum olketa pablik aset long ol province long kaontri olsem skul, road mo pablik bilding blong oli mas stap strong mo abol blong stanap long ol disasta,” Ms Hamish i talem.

“Mo niu klasrum bilding blong Kawenu Primary skul hemi wan long olketa.”

Insaed long niufala klasrum bilding ia i kat ol niu toilet blong ol student mo ol staf i save yusum.

I gat wan niufala septik tank mo soak way o drainage blong doti waste tu.

Mrs Joel i talem se hemi glad long gudfala wok blong kontrakta blong mekem se klasrum ia hemi sef blong ol pikinini.

“Mi talem tankiu tu long World Bank blong save sapot long saed blong mani mo luk fowod blong wok moa wetem olketa long futja,” hemi talem.”

” Naoia skul bae hemi disaed nomo long wan deit blong mekem ofisiol opening blong niufala klasrum ia wael ol studen i stap learn yet long skul hall.”

(Visited 75 times, 1 visits today)

About The Author

You might be interested in