Ken Kahu blong pat long Tokyo kem

Tokyo Paralympic i akseptem Ken Kahu blong ripresentem Vanuatu long Tokyo Paralympic kem long August.

Hemia hemi wan historikol seleksen we i lukim se fes tim wan man wetem disabiliti long Vanuatu i selek blong patisipet long Olympic kem.

Ken hemi stap long Top ten blong Javelin throw rikod long Wol, latest rikod blong hem hemi 57 mita, rikod ia nao hemi sikurem wan ples blong kompete long wol tunamen ia.

Long semtaem hemi bin saksesful blong winim ol medal long ol internationally rank event we hemi bin mekem hem olsem wan pre-qualified athlete blong patisipet long Tokyo.

Olsem long Dubai World Athletics Champions, Queensland Athletics championship mo long Arafura kem.

Mbe tete Vanuatu Paralympic Committe i kat wan moa bigfala risen blong selebret from se naoia Ken hemi ko tru blong patisipet long bigfala international kem long Tokyo.

Margaret Macfarlane, President blong Paralympic Committee, i anaonsem gud nius ia long eli wik ia.

“Hemi wan exciting samting mo gud nius blong evri wan, mo mifala i glad tumas blong anaonsem, “Margaret Macfarlane i talem wetem bigfala smile long fes blong hem.

Mrs Margret i talem se Ken hemi stap ko tru long ol tough training naoia olsem preperesen long ol bigfala kem ia akensem ol nara kaontri raon long wol.

“Trening blong Ken hemi kam moa intensiv naoia from naoia i kat 98 dei nomo i stap towods Para kem long August, we i lukim se Ken bae hemi kompit samples long namba 27th.”

Margret i talem se oli stap wet tu long respon blong Tokyo Paralympic Committee blong Ellie Enock mo Marceline Moli blong oli patisipet long kem.

“Tufala tu oli bin ko aot long world mo kompete long ol kompetisen, mo kat ol world ranking, Ellie hemi wan Talented Para- Athlete long saet blong javelin, shot put mo A diskas. Mifala i luk se bae oli selektem hem from javelin mo shot put long Tokyo mbe i no klia yet.

“Marceline hemi spesel long 100M, 200M, 400M, long Jump, javelin, shot put mo volleyball. Mbe seleksen blong hem long Tokyo might bae hem i patisipet long 200M, 400M o long jump.” Margaret Macfarlane i talem.

Fanding blong trenem tim blong ko long Tokyo Olympics i kam long Australian Department blong Foreign Affairs, Oceania Paralympic mo Vanuatu Paralympic Committee.

Mbe long saet blong fanding blong travel mo akomendation i nogat yet, Margaret, i talem se oli stap wet long rispon blong patisipesen blong Ellie mo Marceline bifo hemi mekem wan budget mo rikwestem wan vatu.

Mbe wan nara impoten samting we oli nidim tu hemi blong pripea from Tokyo, hemi blong kavman i prioritisem olgeta blong tekem vaccine blong COVID-19.

“Mifala i wantem se Kavman i mas putum mifala along prioriti list, from we hemi impoten blong mifala i karem Vaccine ia bifo mifala i travel.”

Wael Paralympic tim i stap pripea from Tokyo long semtaem ae blong olgeta i stap long Common Wealth kem long September.

“Yes fokas hemi long Tokyo naoia mbe i kat fulap nara opotuniti blong ol pipol wetem disabiliti.”