Kerepei Health senta blong open long October

Niu Kerepei Health senta long Not Maewo bae i open long en blong October blong provaedem kwaliti health seves long pipol.

Penama Public Health Manager, Markson Tabi, i talem long VBTC Nius se seves blong health bae i apgred wetem inkris namba blong ol staff mo bae i kat ol fasiliti olsem scan mo wan lab test mo tu helpem ol mama blong bonem bebe.

Mr Tabi i talem se bae niu health senta ia i save akomodetem ova 2000 pipol sapos i kat wan moa erupsen blong Manaro volcano long Ambae.

Hemi talem se Kerepei Health senta long Maewo aelan hemi sef.

Mani blong bildim bak health senta ia Australian Kavman i kivim anda long Vanuatu Health Program tru long DFAT long wan amaon blong ova VT13 million.

Long taem blong erupsen blong Manaro volcano long 2018, ol health ofisiol long Ambae i bin ko daon long Maewo blong helpem ol pipol we oli bin muv i ko liv longwe.

Mr Tabi i talem se hemia nao tinktink blong muvum health senta ia i ko long wan nara level blong i save helpem pipol sapos i kat wan moa disasta blong volcano.

Hemi talem se long kes nomo sapos wan sik man i nid blong pas tru long wan operesen bae oli sendem hem i ko long Santo o Efate.

Mbe ol pipol long Maewo bae oli benefit bigwan long seves blong health naoia taem hemi open.

“Mi kol nomo long ol lida blong Maewo blong kopereit tugeta wetem ol pipol mo lukaotem gud ol fasiliti long bilding ia,” Mr Tabi i talem.

“Hemia hemi wan niu developmen blong provins long yia 2021 mo hemi askem rispek long propeti ia.”

Opening blong Kerepei Health senta bae i stap long 28 October.

Mr Tabi i askem kontrakta blong vinisim wok projek ia ariap blong opening i save hapen from kontrak blong Australian High Commissioner, Sarah deZoeten bae i en long November.