Kiaman nius online i mas stop

Presiden blong Media Association blong Vanuatu i kol long pablik blong stop serem ol kiaman nius long social media long taem blong COVID.

Stevenson Liu i askem ol memba blong Media Association long kaontri we oli lukaotem ol pej grup long fesbuk blong help stopem ol kaen infomesen olsem.

Hemi talem se long Vanuatu plante pipol oli yusum social media mo hemi impoten blong pasem stret infomesen.

“Naoia yumi luk plante long ol fake o kiaman nius hemi travel ariap bitim sik coronavirus ia; mo long kes ia hemi rili denja espeseli long ol pipol we oli no rid plante mbe oli listen long wanem ol nara pipol oli stap storian long hem we i no tru,” Mr Liu i talem.

“Olsem Media Association blong Vanuatu, yumi mas traem blong diskarejem ol kiaman nius we pipol i harem nomo long rod mo postem online from i save man i fraet.

“Yumi we yumi admin blong ol popula pej ia, yumi mas folem oltaem ol code blong ethics blong yumi; wanem we yu sherem, hemi mas kat facts mo hemi ol ril nius blong helpem ol pipol we oli stap ridim ol post.

“Mo ol infomesen we oli kiaman, yumi olsem ol admin i no mas entertainem mbe deletim.”

Mr Liu i talem se media i mas stap long foret oltaem wetem tinktink se hemi eye mo sorae blong ol pipol from hemi mas meintenem credibiliti blong hem olsem sos blong tru infomesen.

Long toktok blong Prime Minista blong Vanuatu long eli wik ia long nation, Honoroble Bob Loughman, i advasem ol pipol blong mas oltaem listen long ol advaes mo infomesen we Ministry blong Health i stap putum aot.

Hemi talem tu se ol kiaman nius i no mas spread long kaen taem we kaontri i stap long COVID.

Wan lokol we i no wantem nem blong hem i kamaot i talem long VBTC Nius, i se plante post we i kamaot long social media tete i no hevi from i nokat strong infomesen long hem.

“Sam long ol pipol we oli stap post ia, oli kwik tumas blong post mbe oli no kasem gud infomesen long wanem oli stap traem blong putum online, “ hemi talem.

“Yumi mas save gud topik mo andastanem bifo yumi post online blong pipol i save andastanem.”

Mr Liu i askem ol admin blong ol pej blong social media se long faet akensem COVID-19, hemi wan mas blong tekem infomesen long Ministry blong Health blong help stopem ol kiaman nius online.

Hemi talem se taem pipol i luk ol kiaman nius olsem i save konfusum olgeta online.

 

 

 

(Visited 348 times, 1 visits today)

About The Author

You might be interested in