Kiaman toktok abaot COVID vaccine i mas stop

Ministry blong Health i kol blong ol kiaman information abaot Astrazeneca vaccine i stop from i involvem laef blong pipol.

Minista blong Health, Honoroble Silas Bule, i talem se ol pipol we oli stap ko raon mo spredem ol kiaman infomesen olsem i sud stop.

Hemi talem se ol kiaman infomesen olsem i mekem man i konfus mo fraet.

“Olsem minista blong health, mi askem ol pipol blong oli stop blong mekem man i fraet tru long ol infomesen olsem,” Minista Bule i talem.

“Yu we yu stap spredem ol kiaman infomesen olsem yu stop nomo from health ministry nao i risponsibol long laef blong pipol long taem blong COVID ia; Yu no risponsibol long health mo laef blong pipol blong Vanuatu.

“Mi askem pablik blong stop bilivim ol post long social media from i nokat ol fact mo ol korek infomesen.

“Mi plis blong pipol i tekem not long ol infomesen we Ministry blong Health i stap talem oltaem.”

World Health Orgnisation i rikomendem ol pipol blong tekem COVID vaccine Astrazeneca from i sef mo efektiv.

Communicable Disease Ofisa long Ofis blong World Health Organisation long Vanuatu, Dr Phillipe Guyant, i talem se vaccine ia hemi best we organisation i jusum blong raon Wol i yusum.

Dr Guyant i talem long VBTC Nius se vaccine i kam blong helpem pipol i no kasem virus ia.

Hemi talem se vaccine ia hemi no rili 100 per cent mbe hemi stil save help.

“Sapos wan persen i kasem sik blong suka o high blood presa, hemi stap long hae janis blong kasem COVID -19 virus,” Dr Guyant i talem.

“Hemi stap long denja blong sik moa mo save ded.

“Mo hemi moa gud sapos hemi tekem vaccine blong stap sef.”

Dr Guyant i talem se plante long ol COVID-19 vaccine i kat ol saed efek blong olgeta mbe hemi smol nomo.

“Ol saed efek ia i hapen nomo, long antap arm blong yumi, ples we oli stikim yumi long hem i so o hed bae i so,” Dr Guyant i talem.

“Ol pipol i might experiencem smol feva mbe hemi blong wan o smol taem nomo.

“Naoia yumi no luk tumas ol saed efek ia. Long Fiji i kat 6000 vaccine dose mbe ol pipol i no experiencem tumas ol saet efek.”

Minista Silas i talem se Astrazeneca vaccine pipol i sud trastem from plante pipol ovasi i tekem stik blong hem.

“Mo naoia plante kaontri raon long wol, ol kes blong COVID i ko daon from oli yusum stik meresin ia,” Minista Silas i talem.

“Ministry blong health i bin mekem evri effort blong hem wetem sapot blong ol developmen patna blong karem in Astrazeneca vaccine i kam long Vanuatu folem advaes we i kam long World Health Organisation se hemi sef.

“Mi asurem ol pipol se vaccine hemi sef, efektiv mo hemi redi blong yumi rolem aot.”

Minista Silas i askem pablik inkludum ol joj lida blong stop givim aot ol information blong vaccine long social media we hemi no tru.