Kol blong disasta redi

Vanuatu Meterology mo Geo-Hazards Dipatmen i askem ol pipol we oli liv wetem ol volcano blong stap alert.

Scientific Ofisa long Geo-Hazards Dipatmen, Dan Tari, i talem toktok ia long VBTC Nius mo askem pipol blong rispektem ol infomesen blong volcano aktiviti we oli stap putum aot olsem ol preventiv mesa.

Mr Tari i talem se disasta i no fren blong eni man mo hemi bisnis blong evri man.

Long eli wik ia, tim blong Geo-Hazards i inkrisim alert level blong Manaro volcano long Ambae long level 1 i ko long level 2, folem observation we oli kasem long ol lokol, tufala live camera long Ambae mo Pentecost mo Satelite se hemi produsum bigwan gas.

Mr Tari i talem se Gaua volcano long Banks Grup, Lopevi mo Yasur Volcano long Tanna i stap tu long level 2.

Hemi talem se hemia i nomol blong ol volcano i ko long alert 2 folem volcanic aktiviti blong hem.

Mr Tari i talem se wan volcano i mas wet blong 3-5 yia blong kat eruption olsem.

Hemi talem se long steij naoia oli stap monitarem aktiviti blong volcano ia long Ambae.

“Naoia yumi nosave talem sapos volcano bae i sakem ash mbe taem hemi stap long level ia, eruption i save ko antap,” Mr Tari i talem.

“Mo taem i kat ol ashfall pa yumi letem ol lokol i save.”

Mr Tari i talem se Marum mo Benbow volcano long Ambrym mo Vanualava volcano i stap long level 1.