Kol blong kakae lokol long festiv sisen

Sanma Pablik Health i kol blong pipol i kakae moa lokol kakae long festiv sisen.

Vanua Sikon, Sanma Pablik Health Manager, i talem toktok ia long Krismas In the Park event long Unity Park, Luganville, Santo.

Mr Sikon i talem se i talem se i kat plante fruit mo vegetable we i nogat fertiliser long hem mo hemi gro lokol.

Hemi talem se Non-Communicable Disis o sik blong suka mo hae blood presa hemi wan silen kila long Vanuatu.

“Festiv sisen hemi wan taem we fulap taem we ol famili i ko tugeta mo fellowship wetem kakae mo drink,” Mr Sikon i talem.

“Mbe yumi mas rememba wanem we yumi stap putum i ko long maot, weta hemi wan drink o hemi wan kakae.From long en blong dei bae bodi blong yu i ripim konsequens blong hem.

Mr Sikol i talem se pipol i mas mekem yus long lokol kakae we Vanuatu i rij long hem.

“I no se yumi ko long chinese sto ale pem rice, cake mo fulap sweet kakae blong spoilem health blong ol pikinini mo famili blong yumi,” Mr Sikol i talem.

“So wael yumi stap mekem ol planning blong yumi long festiv sisen ia, hemi veri impoten olsem wan hed blong hom o wan komuniti blong tinktink gud long wanem yu stap planem blong pem blong famili i pat tek lem i mas healti.

“Yumi no pem wan samting we tumoro bae pikinini i krae from tut i soa blong tekem hem ko dentist blong pulum aot tut.

Mr Sikon i apil long ol famili blong mekem sam raet choice long festiv sisen ia blong gudfala health long famili mo komuniti.

Superintendent blong Northern Provincial Hospital long Santo, Dr Andy Ilo, i talem se abaot 150 man i kasem sik suka long 2020 long Luganville.

Dr Ilo i talem se evri wik, ol mas katem tu pat blong leg blong wan famili from sik suka.

Hemi talem se Mo sapos hemi wan papa, mo hemi wok blong tekem mani mo putum kakae long table,hemi rili sad.