Kol blong kambak long jej

Vaturisu i kol long hae disisen making bodi blong jej blong asistim olgeta blong lukluk long sam serious wei blong enkarejem pipol i kambak long Jesus.

Secretary General blong Vaturisu Council blong ol Jif, Jif Jimmy Meameadola, i mekem kol ia long welcome opening blong 72 Presbyterian Jej Assembly long Mangaliliu vilij, Efate long August ia.

Jif Meameadola i talem se sapos i nid blong Presbyterian Jej blong Vanuatu i introdusum sam strict rul long sandei oli mas talem.

Hemi talem se tete long fulap jej, atendens blong jej i pua; taem bell blong jej i ring, pipol i ignorem.

“Yumi 41 yia finis olsem wan christian nation, yumi mas karem olgeta pikinini blong yumi oli kambak long olgeta jej blong yumi wetem tok blong God.Wei ia nomo yumi save safem futja generation blong Vanuatu,” Jif Meameadola i talem.

“Spreading God’s word to the world hemi theme blong presbyterian assembly long wik, mi tink se theme ia hemi stret long taem we yumi stap long hem tete.

“Remindem pipol blong Efate blong kambak long God.”

Jif Meameadola i talem se Efate aelan i hostem Port Vila, Capital City blong Vanuatu mo seat blong kavman hemi bin develop bigwan long las 41 yia sins Independens mbe hemi presentem tu plante jalenj we i afektem social mo economic wellbeing blong pipol blong evri vilij long Efate mo offshore aelan blong hem.

Hemi talem se umemploymen long Efate tete i kam antap folem impak blong COVID-19.

“Taem Vanuatu kavman i bin diklarem State blong Emergency from COVID-19 long March 2020, Efate i bin ko long wan lokdaon mo sins taem ia fulap pipol blong yumi long Vanuatu oli lusum wok kasem tete,” Jif Meameadola i talem.

“Vaturisu hemi wantem mekem kol i kam long assembly ia se plis pasem wan resolution se eni pikinini blong aelan we hemi stap nating long town, olgeta ia oli human risos blong yufala.

“Tekem hem i kambak long aelan blong hemi save wok mo helpem komuniti, aelan blong hem long saed blong wok mo helpem bak komuniti.

“Mo hemi kam wan useful citizen long nation ia Vanuatu mo nomo kontinu blong stap nating olsem nomo long Port Vila o Efate.”

Presbyterian Church Moderator, Pastor John FimoliMalao i rispon blong talem se oli stap lukluk blong expandem jej blong Papa God.

Yia 2021 hemi makem 150 yia sins voyage of encouragement(Gospel) i kasem Mangaliliu vilij long Efate.

Insaed live book 2, japta 10 we Rev.J.Graham Miller i raetem i kat wan stori we i ko olsem, long 1870, i kat tri Polynesian tija oli post long eria blong Havanah Harbour(Efate) hemia inkludim wan tija blong Aneityum mo oli stap anda long kea blong Rev.Peter Mine we i beis long Nguna aelan.

Long 1871, Presbyterian mission i bin sendem wan ship ‘ Dayspring’ blong mekem wan voyage blong encouragement i kam long Havanah harbour we Rev.William Watt i beis long Tanna i lidim.

Rev.William Watt i mit wetem ol tija ia long Efate mo hemi bin ripotem se Yalith nem blong Aneityum tija ia i bin mekem wan gud wok ‘ he gave a good account of his work at Mangaliliu in the southern entrance of the harbour.’