Kol blong klin raonem ol yard

I kat kol blong pipol i klinim gud yard long hom blong preventem dengue fever.

Ministry blong Health i mekem kol ia folem 18 kes blong dengue fever long Port Vila we oli ripotem long April kasem August ia.

Director blong Public Health, Len Tarivonda, i talem se hemi impoten blong pipol i save impotens blong klinim ol yard.

Mr Tarivonda i kol long ol jej, skul, bisnis mo komuniti lida blong ko long ol grup mo klin ap raon long ol hom, komuniti mo ol pablik eria blong preventem mo kilim ded ol mosquito we oli stap pasem sik blong dengue.

Ministry blong Health i ripotem se ol 18 kes ia oli kamaot long Teouma, Erakor, Pango, Nambatu, Tebakor, Malapoa, Bladinere, Freshwota mo Beverleyhills long Efate.

Acting Surveillance Manager long Dipatmen blong Public Health, Wendy William, i talem se ol kes ia hemi wan konsen blong health naoia.

“I kat tu type blong mosquito ia we i kosem sik ia,  i kat aedes aegypti mo albopictus,” Mrs William i talem.

“Tufala mosquito ia i save spreadem tu ol narafala sik olsem zika virus, chikungunya mo ol narafala yellow feva disis long kaontri.

“Mo wetem hemia, yumi save se Malaraia program hemi bin kat wan aktiviti we oli kolem Wolbachia we i tagetem ol ples we aedes aegypti i stap long hem mo ripot we i jes kamaot i soem se oli koverem ap 100 per cen ples we type blong mosquito ia i stap liv long hem.”

Mrs William i talem se naoia ol kes ia i kos long difren mosquito we hemi aedes albopictus.

Hemi talem se bae oli mekem awenes long ol eria we sik blong dengue fever i kamaot long hem mo pasem aot ol mosquito net.

Ol saen blong dengue fever hemi taem hemi wan man i kat feva blong 2 dei mo hed i soa, behaed blong ae i soa, ol masel mo joint i soa mo hemi wantem throat.

Ministry blong Health i advaes blong pipol i kaverem ap gud ol bodi blong olgeta blong preventem dengue fever.

Ministry i talem tu se taem pipol i feva oli tekem panadol mbe i no aspirin.

Kasem naoia i nokat wan tritmen yet blong tritim dengue fever mbe ol health othoriti i askem pipol blong rest mo drink plante wota.