Lokol yacht i wrek long saotwes Malekula

Ofis blong Maritime Regulator i konfem se yacht we i bin stap wrek long point blong Bonvro mo Malvakal long Saot West Malekula long tete moning hem i wan lokol yacht.

Ofis blong Maritime i kol long ol pipol long saotwes Malekula we oli bin tekem samting insaed long yacht ia blong ritenem.

Lloyd Fikiasi, Legal Ofisa blong Ofis blong Maritime Regulator, i talem long VBTC Nius i konfemem se yacht ia hemi rijista long kaontri.

Mr Fikiasi i talem se National Tasfos Komiti blong COVID-19 i talem se long steij ia i nokat risk blong COVID-19.

Hemi talem se yacht ia i stap anchor long eria blong Havanah Harbour long Efate mbe oli nosave hao hemi manej blong flaot kasem long saot west Malekula.

Mr Fikiasi i talem se oli stap wok wetem owna blong yacht blong tekem bak yacht ia.

“Long steij ia mifala i stap apil long komuniti blong saot west Malekula blong ritenem bak ol samting we oli bin ko tekem insaed long yacht ia,” Mr Fikiasi i talem.

“Wari blong mifala naoia hemi oil spil from i kat 20 litre blong fuel insaed long fuel tank long yacht.

“Mi askem ol lokol blong ripotem eni oil spil sapos oli luk long eria blong olgeta.”

Malampa Public Health i bin kol blong pipol i no ko kolosap long yacht ia.

Salome Kenneth, Malampa Pablik Health Manager i talem se hemi askem nes we i stap long Bonvro dispensary blong wok wetem jif long eria ia blong pipol i no mas ko kolosap long Golden Wind Vila; nem blong yacht ia.

Hemi talem se hemi kasem infomesen se faev pipol i bin ko long yacht ia mo oli advaes blong no muv i ko long nara vilij.

Mrs Kenneth i bin talem se oli wantem save wea ples yacht ia i kam long hem; hu ol pipol we oli bin stap long yacht ia mo sapos i kat, ol pipol ia i bin tekem vaccine blong COVID-19 o nokat.

Area Administrator blong saot west Malekula, Gerald Tamau, i talem long VBTC Nius se wan banana bot draeva blong Akham i draev i kam long saot west Malekula mo luk yacht ia mo hemi infomemem hem aroan long 8-9am tete.

Hemi talem se hemi bin infomem Dipatmen blong Locol Authority, Malampa Provincial Government Council mo National Disaster Management Ofis long Port Vila.

Mr Tamau i talem konfemem tu se i kat sam pipol i ko insaed long yacht mo tekem aot ol samting olsem matres.

Hemi talem tu se sam pipol i pikimap ol samting we i bin float aot long yacht i ko long ol vilij kolosap.

Ofis blong Maritime Regulator i askem koperation blong ol pipol blong saot west Malekula blong helpem owna blong yacht ia mo givim bak ol samting we hemi blong hem.

(Visited 1053 times, 1 visits today)

About The Author

You might be interested in