Kol blong ol pipol wetem sik i vaccinate

I kat strong kol blong pipol wetem Non-Communible Disease blong tekem COVID vaccine.

Director blong Curative mo Hospital Service, Dokta Sereana Natuman, i talem se ol pipol we oli kat sik blong suka mo hae blood presa i kat hae janis blong ded sapos oli kasem COVID.

Hemi talem se hemi gud blong oli mas tekem vaccine blong stap sef.

“Ol stadi i soem se ol oldfala man we oli gat sik suka o hae blood presa, oli kat hae janis blong ded from virus ia bae i afektem lung blong olgeta,” Dokta Sereana i talem.

“Taem virus i afektem lung i mekem infeksen long hem.

“Mo i had blong pipol i save breath.”

Dr Sereana i talem se Astrazeneca vaccine bai i help blong preventem pre – mature ded long virus ia.

“Sapos wan man i kat sik blong suka mo hemi kasem virus ia mo hemi disaed blong tekem stik meresin ia, bae hemi katem daon risk blong hemi developem fom blong virus ia,” Dr Sereana i talem.

“Olsem ol nara sik, yumi nidim vaccine blong i preventem ded o ol nara problem we i kamaot long sik blong COVID-19.

“Pipol wetem ol sik olsem sik suka i mas kam fowod blong tekem vaccine from hemi impoten.”

Jack Tom wan lokol we i kat 78 yia, i talem se hemi gud blong tekem stik meresin ia.

“Mi mi wan long ol olfala we mi kat hae blood presa mo mi tink se hemi gud blong mi tekem vaccine ia blong i stap sef olsem we Ministry blong Health i talem,” Mr Tom i talem.

Director blong Public Health, Len Tarivonda, i se tingting blong karem stik we Vanuatu hemi COVID fri hemi blong priperem population blong redi sapos i hapen se i kat komuniti transmission blong virus ia.

 

 

 

 

 

(Visited 33 times, 1 visits today)

About The Author

You might be interested in