Kol blong ol ship crew i risponsibol

Kol blong ol crew blong ship i mekem gud wok taem oli stap sevesem ol pipol long solwota.

Ofis blong Maritime Regulator i mekem stetmen ia folem insiden blong ship Big Sista we i go antap long rif long Lamap, Saot Malekula.

Maritime Inspekta long Ofis blong Maritime Regulator, Jacky Taleo, i talem se i nokat man long rum bong kapten long naet ia.

“Taem oli aot long Liro(Paama) sta kam long Sakao(Saot Malekula), wan crew i on waj long taem ia mo hemi taem blong hemi hand ova duti waj i ko long narafala crew,” Mr Taleo i talem.

“Fes ofisa blong hand ova i ko long niu wan, i no mekem propa handova, hemi kolem nem blong hem nomo afta i wokaot.

“Insaed long wheel haos bae yumi talem olsem ia se man i mas stap long hem oltaem; Big Sista hemi ron long autopilot i ko hem wan.”

“Ship i faerap, evri mama mo pikinini we oli stap long ship long taem ia oli krae from oli tink se ship i draon,” Mr Taleo i talem.

“From even we ship i stap long autopilot mo hemi stap long rif vinis mbe i stil stap ron antap long rif i ko shoa.

“From solwota i drae mbe sapos solwota i bin kam antap, ship ia bae i sperem sandbij wantaem.

“Proropela blong ship i bin katem ston mo i brok afta ship i ko stop hem wan.

Mr Taleo i talemaot se taem ship i stop hem wan, enjin i stap wok yet.

Hemi talem se i nokat eni lik blong fuel.

Komuniti blong Lamap i bin help blong ofloadem ship ia wetem ol emty dram.

VBTC Nius i kasem toksave se Kiwi Trader 2 i stap towem Big Sista i kambak long Port Vila naoia.

Lamap Marine Conservation i aknolejem ol pipol we oli bin kontribut blong muvumaot Big Sista ship.

Committee blong Lamap Marine Conservation Eria i talem se sapos ol pipol ia i no bin givhan bae vessel ia i kontinu blong stap long rif long Lamap.

Chairman blong Lamap Marine Conservation Eria, Joseph Soksok, i mekem tok tankiu ia.

Mr Soksok i talem se ol pipol long Lamap i tinktink strong blong protektem ol marine risos mo tu tingbaot safety blong vessel we i stap from hem i main vessel we i stap sevesem ol pipol long not.

Hemi talem se ol pipol i bin yusum man pawa blong olgeta nomo blong muvum aot ship.

Hem i askem ol vessel we oli stap sefes long solwora mo ol pipol we oli live kolosap long solwora blong kontinu blong meintenem ol marine risos.

 

 

 

 

(Visited 1531 times, 1 visits today)

About The Author

You might be interested in