Kol blong ol woman i tekem cervical cancer test

Vanuatu Family Health Association i kol long ol jej lida, ol jif mo ol man blong mas helpem ol woman blong daonem sik blong cervical cancer.

Nurse Jerol Sakita, we hem i injaj long screening blong cervical cancer, long Vanuatu Family Health, i talem se ol pipol i mas andastandem se cervical cancer hemi wan sik we i no olketa long Ministry blong Health nomo i sud stap tokbaot.

Hemi talem se plante mama mo ol yangfala gel oli arem ol aweanes mbe oli no stap ko from jekap mo hemi gud blong ol man blong olketa i mas tink hevi blong tekem olgeta i ko long jekap.

Mrs Sakita i talem se ol saen blong cervical cancer hemi taem wan woman i gat sex wetem man mo afta long hem ia hem i lukim blad.

Ol nara saen hem i taem hem i luk sikmun blong hem ova long nomol taem blong sikmun we hemi tu kasem seven dei.

Narawan hem i taem ol doti wota i kamaot long tabu pat blong wan woman mo i gat rapis smell.

Mrs Sakita i talem se nara saen hemi ol olfala woman we age blong olgeta i bitim 50 mo oli nomo luk sikmun blong olketa mbe tu o tri yia afta oli luk bakeken. Hem ia i no nomol from hemi wan konfem saen blong cancer.

“Ol man tu oli pasem bebet blong sik ia mo oli mas help blong daonem sik ia tru long fasin blong gat wan patna nomo,” Mrs Sakita i talem.

Pepet we i kosem cervical cancer oli kolem Human Papilloma Virus. Ol man oli ol mein karia blong virus ia mbe hem i nosave afektem olgeta. Mbe ol man nao oli help blong spredem plante tru long fasin blong gat fulap patna.

Mrs Sakita i talem se sapos yu gat plante patna bae yu nosave gat wan helti laef olsem we jej tu i stap tokbaot.

Hem i talem se long wan stadi we oli bin karemaot, risal blong hem i soem se wan aot long everi ten-woman oli save divelopem sik ia cervical cancer mo long Australia wan aot long everi 1000-woman.

Hem i talem se hem ia hem i hae tumas.

Mrs Sakita i talem se i tekem ten kasem 15 yia blong wan woman i kasem stej blong cervical cancer.

Mrs Sakita i talem se taem wan woman i kat sex long tinej yia blong hem, olsem taem hem i 13 o 19 yia, sik ia i save stap long hem be bae hem i nosave.

Hem i talem se so hem i impoten blong ol jej lida oli involve blong talem se sex long eli age hem i no wan gudfala fasin.

Hem i talem se stret age blong gat sex hem i long 24 kasem 25 yia from bodi hem i gro gud.

Vanuatu Family Health i kol long olketa mama blong mas tekem Pap smear test blong cervical cancer.

Mrs Sakita  i kol long ol mama long ol aelan blong mas ko mekem test ia tu long ol helt fasiliti kolosap long olketa olsem Norsup hospital long Malekula, Northern Provincial hospital long Santo, Lolowai hospital long Ambae, Vanuatu Family Health mo Vila Central Hospital long Vila mo sam nara klinic.

Wan yang mama blong Efate i talem se hemi klad blong go tru long test ia mo talem se naoia hemi save se hemi helti.

Mrs Sakita i talem se cervical cancer hemi wan sik we hemi pas tru long sex mo hemi semak olsem HIV mo Conoria mbe oli gat ol difren bebet.

Vanuatu Family Health i bin stap mekem plante aweanes blong cervical cancer raon long kaontri.

 

 

(Visited 746 times, 1 visits today)

About The Author

You might be interested in