Kol blong pipol i stap alert

Vanuatu Meteo mo Geo-Hazards i talem se pipol i mas stap alert from volcanic aktiviti long Tonga i ko hed yet.

Manager blong Weta Forecast, Fred Jockely, i talem se oli kanselem ol tsunami woning long Vanuatu long 3o’klok tete moning folem ol infomesen we oli kasem long ol taet kej long Lenekel, Port Vila, Litzlitz mo Santo se solwota i stabol mbe i save jenis.

“Sapos yumi harem wan moa saon enitaem naoia i ko, ten hemi wise blong yumi no wet long Meteo,”Mr Jockely.

“Hemia i no hapen nomo long Vanuatu mbe hemi fastaem long region long pasifik blong yumi react long wan tsunami we i kos tru long wan sabmarine volcano.

“Wael aktiviti blong Tonga volcano i stap kontinu, yumi no wet woning mbe yumi folem ol tsunami dril exercise we yumi bin lanem mo folem. Ol volcano blong Yasur, Manaro we oli kontinu blong erupt mbe oli stap long graon. Hemia long Tonga hemi stap long solwota, mo i kat bigfala boiling blong wota antap long volcano ia mo tsunami i save hapen naoia i ko. Mo sapos hemia i hapen bae yumi putum aot ol advisory bageken.

Mr Jockely i talem se dilei blong tsunami woning hemi from system blong Vanuatu i rikodem nomo tsunami we earthquake i kosem mbe i no volcano.

Hemi talem se Vanuatu i dipen long Pasifik Tsunami Woning Senta blong givim infomesen as hemi wan festaem situasen we wan volcanic explosen long Tonga ol pipol long Vanuatu i harem sound blong hem.

“Yumi kat lokol netwok mbe hemi save ditektem earthquake mo talem magnitude, location mo depth mbe hemi nosave ditektem earthquake i generetem tsunami o nokat,”Mr Jockely i talem.

“Hemia nao yumi dipen bigwan long Pasifik Tsunami woning senta. Long insiden ia hemi no earthquake we i mekem tsunami, hemi volcano. So system blong olgeta hemi set folem earthquake mo inosave ditektem tidal wave we hemi generet tru long andawota volcano long Tonga mo hemia nao hemi risen blong dilei long tsunami woning.”

Eria Administrata blong Aneityum, Selwyn Daniel i talem se i kat smol damej mo flood long sda jej.

Mr Daniel i talem tankiu long Meteo blong explenem situasen ia.

“Mifala i nosave kasem eni woning long sms long fon mbe mifala i laki blong harem saon nomo,” Mr Daniel i talem.

“I kat wan bigfala saon i stap faerap we yumi evriwan i harem. Mifala i stap tink se hemi sabmarine volcano blong mifala long Aneityum mbe mifala i kolem olgeta long vila mo oli talem se hemi volcano blong Tonga.

“So mifala i talemaot mesej ia long ol pipol from ples ia hemi wan spot we plante taem mifala i kasem tsunami. Afta ol Community Disasta Ofisa oli help muvum ol man i ko antap long hil mo long moning ia oli jes stap kam daon. I kat smol damej mbe i no bigwan.”

Wan mama long Pangpang, Efate, we i bin pat long telephon rikwes tete moning long Radio Vanuatu, i talem se ol fish i ded long solwota.

“Mifala i sek long noise ia nao mo sek se solwota i bangem ol bot mekem oli bangem wud,”Mama ia i talem.

“Mekem se ol lokol i ko tekem aot ol bot long solwota. Afta mifala i tink se hemi wan bigfala wave nomo mbe taem mifala i ko solwota, mifala luk ol fish i ded, taem mifala i stap pikim ap mbe mifala i sek se moa wave i kam.”

Long eria blong Imanaka pasis long Tanna, Lokol Daniel Ben talap i talem se 290 m wave i pas long pasis ia i ko kasem long whitegrass airpot.

Hemi talem se ol pipol i bin muv i ko long Tafea college blong sef long ol wave ia.

Ol pipol long Not Wes Efate long Havanah harbour i luk solwota i dry bigwan.

Wan lokol long lelepa i se solwota i dry bitim mak mo ol bot owna i mas muvum aot bot.

Hemi talem se pipol i bin rere blong muv taem oli luk ol mesej blong Meteo.

Volcano blong Tonga i bin aktiv long 20 Decemba 2021.

Mo long fridei ia, Tonga Meteo Service i talem se volcano ia i sakem ash, steam mo gas long 20km i ko long air.

Mr Jockey long meteo ofis i talem se hemi wan bigfala eruption blong andawota volcano long Tonga i mekem se Vanuatu mo ol nara pasifik kaontri i tekem wave blong hem.

Hemi talem se woning blong tsunami hemi no dilei nomo long Vanuatu mbe Fiji mo ol nara pasifik kaontri folem system ia.

Mr Jockey i talem se pipol i save kolem fri line namba 116, oli save visitim meteo ofis fesbuk o ko long website www.vmgd.gov.

United States mo Japan i wonem ol pipol long ol Pacific koastlin blong stap aot long shoa from tsunami wave long Tonga volcano eruption.

Radio New Zealand i ripotem se Japan i givim woning long ol wave we i hae kasem tri mita mo wave blong 1.2 mita i hitim saot blong kaontri.

Us i givim woning long ol strong karen mo wave mo coast flooding.

National Weather Service blong Alaska i konfemem tu se oli harem expolsen ia.

 

 

 

 

 

 

 

 

 

(Visited 2075 times, 1 visits today)

About The Author

You might be interested in