Kol blong Prime Minista Loughman i resign

Opposition i kol blong Prime Minista i resign.

Lida blong Opposition, Ralph Regenvanu i askem Prime Minista, Bob Loughman tru long wan Press Conferens we 28 Memba blong Palemen i holem tete moning, afta we Palemen Fes Extra Ordinary Sitting i nosave sitaon blong tokbaot faev mosen from i nogat namba we hemi 34.

Koling blong risaen ia, hemi blong rispon long Press Conferens blong Praem Minista Loughman we hemi talem se i nogat wan man i askem hem blong risaen.

“Prime Minista hemi mas tinkbaot se anda long atikol 43, (2) blong constitution hemi lusum trast blong legislature vinis,” Mr Regenvanu i talemaot.

“Legislature ol Memba blong Palemen we oli putum hem oli mandetem hem blong kam Prime Minista oli witdroem(karemaot) mandate(pawa o otoriti) vinis.

“Mi luk Press conference blong hem yestete(Monday) hemi talem se i nogat man i askem hem blong resign. Okay mi olsem lida blong opposition mi stap askem hem blong yu resign, yu nomo kat sapot. Resen from wanem ol Memba blong Palemen oli muv aot long Kavman blong sapotem mosen ia hemi from ol simpol resen blong pablik mo national interes long ol constituency blong olgeta. Eni kaen alegesen blong personal interes ol kaen olsem ia hemi unwarranted. Mo mi wantem talem tu se Prime Minista i bin talem se yumi no wok long rabis o personal interes o kaen olsem ia, mi wantem remindem hem o nation se kavman we i bin fom afta long 2020 general eleksen hemi wan pati fom aot long ol pati mo wan wan pipol i semak nomo long grup we mifala i stap naoia so, mi nosave from wanem hemi tink se hemi kat pawa long grup we i kat pati mo wan wan pipol mo yet mifala long narasaed i nosave mekem semak.”

I kat faev stampa alegesen blong mosen we i ko akensem Prime Minista blong Vanuatu, feswan hemi alegesen blong traem blong jenisim demokratik sistem blong kavman. Narawan hemi alegesen se i nogat wan gudfala manejmen blong Public Service Commission,  alegesen blong no folem ligol tenda proses ova long kontrak blong Hospital, alegesen se program blong sitisensip oli no manejem gud mo las wan hemi Gross mis-manejmen blong skolasip.

Twenty Eight Memba blong Palemen we oli putum mosen akensem praem minista i biliv se ol faev topik ia, hemi ol risen blong mosen.

Prime Minista Loughman i talem se Kavman i talem se hemi kat namba mo bae hemi no resign.

Hemi talem se bae hemi rispon long ol alegesen ia long Friday.

 

 

 

 

(Visited 3511 times, 1 visits today)

About The Author

You might be interested in