Kol blong sapot mama wetem disabiliti

I kat kol blong help bildim wan gudfala haos blong wan mama wetem disabiliti long Central Tanna.

Calm Haven Disability mo Widow association i mekem kol ia afta we oli faenem aot wan mama wetem Disability we i no save wokbout, mo smol boy blong hem i mas skipim skul blong lukoutem hem.

John Bill Iamul, Vice Presiden blong association mo semtaem Area Administrator blong Central tanna, i talem oli bin bildim wan haos longtaem finis mo naoia hemi olfala mo tufala i nidim wan gudfala haos.

“Current haos blong tufala i kat fulap hol long hem mo tufala i stap colcol evri naet,” Mr Iamul i talem.

Sins we Association i bin faenem tufala oli bin askem donation blong ol blacket, mo Blue Cave bisnis long Tanna i bin mekem donation ia.

Mbe naoia oli stap reisem mani blong bildim wan permanent haos blong tufala.

Mocklyne Paul, women wetem disability, afta we hemi bonem smol boy blong hem Pierre, famili i advaesem hem strong blong mas ko long operation blong stopem hem blong nomo kat pikinini, afta long operation hemi nomo bin save wokbout.

Famili blong hem oli bin muvum tufala araon mo naoia oli live wetem wan olfala man we hem too i kat disabiliti, mbe kondisen blong hom i no stret.

Long hom smol boy blong hem nomo i tekem risponsibiliti blong lukoutem mama blong hem.

“Long mi personali hemi had lelpet blong witnessem smol boy ia i cuk, i wash, i karem mama blong hemi i ko long toilet, pusum hem olbout sapos hemi nid blong ko long clinic.” Mr Iamul i talem.

“Evri moning hemi mas kerup cuk, mo mekem sua se evri samting mo mami  hemi orit bifo hemi ko long skul.

“Samtaem spos mami blem hemi rili nidim hem, bai hemi save absent long skul blong tu wik olsem.”

Association blong Mr Iamul i stap luk blong reisem wan amaon blong araon VT 500,000 blong bildim niufala hom blong tufala.

Smol boy ia i kat 9 yia mo hemi stap long class fo.