Kol blong sevem solwota blong Erakor

Ol pikinini long Erakor vilij oli kol long Kavman blong sevem solwota blong olgeta.

Wan pablik awenes hemi tekem ples long wiken abaot polution long solwota.

Hemia i wan tinktink we ol pikinini long Erakor bridge mo yut oli lidim wetem sapot blong ol komuniti lida blong olgeta.

Plante risos hemi lus long komuniti ia mo no mata long polusen pipol i kontinu blong karem kakae long solwota.

Elodie Nimis, lokol mama, i talem se plante paren oli no wok mo ol pikinini i stap ko long skul.

“Wanem we i stap naoia, mifala i stap yusum solwota ia plante blong karem ol kakae olsem crab, shell mo fish,” Ms Nimis i talem.

“Mbe taem i poluted o kat doti lem, mifala i no stop blong ko tekem.

“Doti i ko mbe mifala i ko karem, from mifala i no wok.

“Samtaem mifala i ko karem mo kam kakae, mifala i save se bae mifala i sik, mbe hemi onli wei blong winim vatu mo fidim famili.

Minista blong Lands mo Natural Resources, Honoroble Edward Nalyal, hemi bin ko daon long komuniti long wiken ia, mo joinem hae Jif blong Erakor vilij blong luk fes han ol ples we polution hemi stap kamaot long hem.

Semtaem oli putum leaf namele blong stopem man blong nomo yusum solwota folem ol tes we Water Dipatmen hemi mekem, se hemi nomo sef blong karem kakae mo swim.

Chief Timothy Natongtong hemi bin talkabaot ol ples we polution i kam long hem, olsem ol sewage system blong ol bisnis house, toti we pipol i sakem, ol masin we i stap klos ap long sowata, mo toti blong we i kamaot long septic blong Vila Central Hospital.

Ol jif oli tokbaot tu ol artificial aelan we oli bildim, hemi stopem karen blong klin wota i kam insaed long lagun.

Test we Water Dipatmen hemi mekem, i soem se i hae level blong bakteria, hemi no sef blong pipol i karem kakae long hem.

I kat ripot tu long aelan ia se ol pikinini oli stap kasem ol rapis so mo sikras. Mo plante time oli mas rinjim gud olgeta afta we oli enjoyem solwota.

Chief Jif Kalsaur Kalomtak Pomal 8, hemi talem se wetem visit blong Minista Nalyal oli hop blong luk wan solution i tekem ples.