Kol blong stopem repatriation flaet

Shefa Health i kol blong stopem repatriation flaet folem health limit risos blong mekem COVID-19 swap tes.

Shefa Health Manager, Obed Manwo, i talem se Operation Tim i bin rikomen long National COVID-19 Tasfos blong stopem repatriation fastaem from i nokat enaf health wokman blong save kondaktem COVID swap tes long kwarentin.

Mr Manwo i talem se Shefa Health i gat tri tim nomo we wan wan Dokta i lidim mbe naoia evriwan ia i stap long precautionary kwarentin.

“Tufala fes tim nao, i bin mekem ol swap long ol repatriation flaet fastaem mo las tim we oli singaotem ‘clean tim’ i blong mekem swap long ol franlaen wokman inkludum olgeta long health we oli stap long kwarentin naoia,” Mr Manwo i talem.

‘Clean tim’ ia oli oltaem stap mekem swap long dei 10 mo stap long 2 dei nomo sapos evri franlaen i tes negativ mo oli save ko outsaed.

Mr Manwo i talem se even naoia, ol health franlaen wokman we oli stap long precautionary kwarentin oli mekem own swap blong olgeta from i nokat enaf human risos we oli wiling blong help aot.

Mr Manwo i talem se i no hemia nomo mbe oli nid tu blong fixim ol risk alaowens blong ol helt franlaen wokman ia.

VBTC Nius i andastan se sins repatriation i stat oli neva bin pem risk alaowens mbe oli stap pem nomo ova taem blong olgeta.

Long nara nius, 100 pipol i livim kwarentin fasiliti long Iririki long wiken we i pas.

Olgeta ia oli bin kam long wan flight blong Auckland long February 12.

Long tete, 98 pipol we oli bin kam long Brisbane repatriation flaet long namba February 15 bai livim kwarentin from oli vinisim 14 dei kwarentin blong olgeta. Repatriation flaet blong New Caledonia, 24 pipol i bin kam long flight ia mbe 18 nomo bai oli aot long kwarentin long Wednesday wik ia mbe six pipol i tes positiv yet long COVID-19.

VBTC Nius i kasem toksave se repatriation flaet hemi saspen yet folem ol COVID-19 kes we i stap long kwarentin.

 

(Visited 858 times, 1 visits today)

About The Author

You might be interested in