Kol from eli health jek ap

Kol blong ol woman i mekem eli jek ap long breast mo cervical cancer blong kasem tritmen long eli stej.

Dokta Richard Leona, Consultant Surgeon mo Dr Robin Atkin- Registrar Obstetrics and Gynecology i mekem kwik kol ia.

Tufala Dokta i talem se fulap woman i ko pas leit taem oli sik bigwan vinis long cancer long titi mo basket blong bebe we i mekem plante ded.

“Problem blong yumi long Vanuatu mo espeseli third wol kaontri hemi leit presentesen, Oli present taem we lump ia hemi gro bigwan vinis long titi. Mo hemi stat blong spread vinis i ko long ol nara pat blong bodi,” Dr Leona i talem.

“So impoten mesej hemi blong kam eli. Tete yumi kat hae reit blong ded long breast cancer from leit presentesen. Breast cancer taem hemi kasem wan mama hemi no olsem sik blong appendix we yu filim pain, yu harem olsem yu wantem draot blong sam dei ale yu jes kam long hospital. Breast cancer hemi nogat pain mbe hemi kam wetem wan lump long titi. Mo ol gel long yang age oli mas stat jekem olgeta naoia.

“God i kriatem man mo woman. Blong kam wan woman, yu expos long breast cancer, so hemia i fes samting we yumi mas save.

“I nogat aktual cos blong hem mbe ol risk fakta hemi ol wanem we yu mekem o yu liv long hem we hemi exposem yu blong kasem breast cancer. Sapos yu kat wan famili we oli bin kat breast cancer bifo yu tu yu kat chance. 5 to 10 breast cancer oli folem blad line.

“Mo long ol develop kaontri tete yumi save ol gene blong talem se yu kat cancer ia o nogat. “Wan moa samting sapos mama hemi expose blong karem pikinini long wan eli age o hemi karem pikinini we hemi araon leit 30 o 40 yia. Nara samting sapos yu bin kat breast cancer long left titi ten yu kat hae jans blong kat cancer ia long raet titi.

“I kat resen from wanem nao ol woman i leit blong kam pas from cancer; Mein wan nao hemi fulap i ko from kastom meresin.

“Long praktis blong mi, mi nosave faenem wan kastom meresin blong breast cancer.So hemi best blong present long wan fasiliti blong luk ol health ofisiol mo afta i save kat ples blong kastom meresin mbe yu kam eli taem lump ia hemi smol.”

Dr Leona i admitim se Referal health system blong kavman i nidim impruvmen from fulap woman oli liv long ol rural eria i had blong kasem wan health fasiliti.

Hemi talem se hemi taem i kat wan kwik referal system blong dil wetem ol kes we oli kam long ol aelan olsem long midel bush blong Tanna.

“Sam man i kat biliv long prea, olsem bible tu i talem se faith withaot aksen yu nosave muvum wan mountain. So yu prea mo ko jek ap from hemia nao prayer ia yu prea from. Interesting hemi ol woman we oli kat breast cancer oli skul gud mo oli kat ol gudfala wok long kavman o Non-Government Organisation.

“Sik ia hemi no folem rispek blong yumi.”

Cervical cancer hemi cancer long nek blong basket blong bebe. Hemi cancer long doa blong basket blong bebe. Long Vanuatu plante kes long evri manis mo hemi pas tru long sex.

Dr Atkin i talem se kalja tu i mekem plante woman i no ko jek from oli shame.

“Tufala sik ia man i nosave ded long hemn sapos ol woman i kam eli blong jek ap,” Dr Atkin i talem.

“Long proses blong pepet we i kosem cervical cancer long nek blong basket ia, hemi tekem 10-15 yia blong kam wan cancer,” Dr Atkin i talemaot

“Cancer blong basket blong bebe yumi save preventem taem yumi kasem eli blong stopem wan steij we i nogat tritmen blong hem long Vanuatu.”

Dr Leona i talem se blong karem tritmen blong sik blong cancer long titi ovasi hemi sas from hemi VT5 -6 million.

Mo i semak long cervical cancer from i nogat ol stret fasiliti blong tritim sik taem i ko long leit steij we woman i sik bigwan.

 

 

 

 

(Visited 518 times, 1 visits today)

About The Author

You might be interested in