Kol from gudfala governans -Ombudsman

Ombudsman i kol blong good governans i stap long ol kavman ofis.

Darval Simon, Acting Director long Leadership Code Investikesen long Ombudsman Ofis i talem toktok ia long panel diskasen blong Public Service Dei long Port Vila long wik ia.

“Evriwan oli mas save pepes blong olgeta; Mo long bigfala pikja yumi ol Public Servants i mas wok tugeta oltaem blong no wet se samting i hapen afta yu jes talemaot. Yumi kat ol risponsibiliti blong mekem sua se yumi pratisim gudfala governans insaed long wan ofis blong yumi,” Mr Simon i talem.

“Yumi sevem pipol blong yumi olsem we oli stap pem yumi blong mekem wok. Evri eight risponsibiliti blong gufala governans ia olsem akaontabiliti, transparency, effiency, risponsibiliti, inclusivenes, patisipeit mo folem rul blong loa hemi samting we i stap long Constitition long Ombudsman act long Leadership code act.”

Director General long Justice Ministry, Arthur Faerua i talem se ol wokman blong kavman oli mas luk olgeta se ol seves provaedem.

“Yumi provaedem seves nomo, yumi no ol bisnisman, investa, film star, even yu wan dokta be yu jes wan seves provaeda nomo long en blong dei, nating moa mo nating les,” Mr Faerua i talemaot.

“Mo olsem wan seves provaeda long lukluk blong mi i kat faev stampa principal blong yu mas tinkbaot taem yu kam insaed long ofis blong provaedem seves. Fes wan yu mas politikali neutral from hemi impoten blong yu save tinkbaot ol samting long wan stret wei blong save provaedem seves long stret man.

“Nambatu samting hemi, yu mas save hao blong mekem wan disisen, komplen blong plante pipol tete hemi slo seves blong kavman. Yumi kat wan anual budget be taem i pas, budget i stap silip yet.  Yumi nid blong impruvum rikruitmen hemi resen from wanem yumi kat career day; Yumi stap traem blong tekem in ol niu blad i kam long system mo yumi nosave mestem from bae hemi ko long wan nara ples.

“Afta yumi ol seves provaeda i nid blong kat wan pratis blong open kavman; i minim se yumi mas inkludum seves diliveri long ol storian blong yumi. Yumi mas lisen, storian mo harem pipol i talem long yumi rod we bae yumi ko. Yes yufala i kat ol corporeit plan we i bigwan be i mas kat spes blong ol komuniti i kam insaed blong stori wetem yumi. Lukaot ol plan ia nao i stap blokem yumi blong no sakses.

“Laswan yumi nid blong luksave Vanuatu kontex, olsem tete taem oli talem se bae yumi statem forum long 2pm, yufala i jes kam long 3pm. Mi save se Public Service Commission i stap lukluk bak long act. Long las wik taem ol jif oli kam blong kat konferens long plesia, Public seves i no ko storian wetem olgeta blong askem tinktink blong olgeta. Olsem wanem yumi fraet?

Mr Faerua i talem se hemi taem ol wokman i luksave ol eria ia.

Theme blong Public Service Dei long yia ia hemi ‘Promotem gudfala fasin blong wok long Public Service insaed long Republic blong Vanuatu.’

 

 

(Visited 264 times, 1 visits today)

About The Author

You might be interested in