Kol from kwik asesmen-Saot Erromango

I kat kol from kwik asesmen long disasta blong flood mo landslide long Saot Erromango.

Jif Jason Mete long Williams Bay, i kol blong Saot Erromango i mas diklea wan disasta zone.

Jif Mete i talem se ol pipol i nidim help naoia.

“Mi wantem mekem wan spesel apil i ko long Kavman, National Disaster Management Ofis, Memba blong Palemen blong Tafea Outer aelan blong Williams Bay i diklea wan disasta zone,” Jif Mete i talem.

“Williams Bay i fesem wan disasta we mifala i neva luk bifo from i bigwan tumas.”

VBTC Nius i kasem toksave se riva blong Williams Bay i flood folem hevi ren mo strong raf solwota i kam insaed mo join wetem riva mo landslide -graon i brok mo foldaon i ko insaed long ol haos blong pipol.

Jif Mete i talem se ol pipol i nomo kat kakae from evri wan i ko long solwota.

“Riva flood hemi jes ko worst from wota i ron kam daon long hil,” Jif Mete i talem.

“Laki se saeklon Dovi i stap ko mbe varanda blong bilding blong Saot Erromango Eria Kaonsel i jes sitaon nomo long riva we i stap ron.

“Nara bidling hemi Pacific Petroleum we sapos moa hevi ren bae yumi lusum tufala bidling ia from coastal erosen, wan bigfala disasta long climate change.

Jif Mete i talem se hemi nidim kwik rispon blong kavman.

 

(Visited 267 times, 1 visits today)

About The Author

You might be interested in