Komuniti blong akseptem ol ex-prisiona

Kol blong komuniti i akseptem ol man we oli kamaot long kalapus blong stopem fasen blong mekem rong bakegen.

Director blong Correctional Services, Johnny Marango i talem long VBTC Nius se oli no ko long steij blong luk ol olgeta we oli mekem rong bakegen from stigma be ova 10 percent long olgeta we oli kamaot bae i likeli blong oli mekem rong bakegen.

“Stigma blong lukluk nogud long olgeta hemi olsem seken kalapus. Taem i kat nogud lukluk ol pipol ia oli no fri yet. Mo yumi stap kriatem wan laef we i mo had mo hemi no hao yumi sud opereit. Yumi sud jensem tinktink mo aplaem ol ril value, biliv long kastom, kalja mo christian biliv,” Mr Marango i talem.

“Hemi wan veri expensive exercise from hemj nidim tri kakae long wan dei plas yumi mas tekem olgeta i ko long medical care, wellbeing mo welfare blong hem long prison. Kavman i mas pem tu utility cost blong wan prisina  mo taem wan i mekem rong bakegen i minim se hemi mas kam sevem ful sentens blong yia we i stap. Wan low renj kost blong aroan VT1500 wan dei be wan totol kost blong wan prisina long averej bae i moa.

“Ol felo citizen ia i no reis long prison ; Mifala i trenem mo helpem olgeta blong kam ol gudfala persen mo hemi wok blong kavman be naoia ol komuniti jif, jej lida, Papa/mama mo famili memba blong akseptem olgeta.

“Isu ia i hapen evri taem mo hemi wan jalenj.”

Chain to Life Ministry, wan christian Non-Government Organisation long Efate we i stap ranem ol jej, health mo sports program long ol ex-prisiona mo ol prisiona long kalapus i talem se oli nidim sapot blong helpem olgeta i kat wan gud laef long fiuja.

Spokespersen blong Chain to Life Ministry, Danken Hinge i talem se kavman i mas invest long ol program blong sapotem pipol be i no blong ko hed blong lukaotem ol risos pipol blong hem insaed long kalapus.

“Sapos yumi kasem enaf sapot blong mekem ol program blong sports, health, mo bible stadi bae i nogat tumas trabol blong oli kobak long kalapus,” Mr Hinge i talem.

“Naoia mifala i wok plante wetem Dipatmen blong Correctional Services be wok ia hemi blong plante Non-Government Organisation blong wok tugeta.

“Taem yu nemem hem wan ex-prisiona kwik taem nomo i kat lukluk nogud; Yu talem se oh man ia i bin ko long kalapus ia afta lukluk hemi jenis, environmen hemi filim tu i difren; hemi ko spendem tu yia long jail, hemi kamaot, smol brata blong hem i haed, filing insaed long famili nomo i putum aot hem blong hemi save mekem semak rabis fasen,” Mr Hinge i talem.

“Hemi kostem kaontri bigfala mani; Olsem sapos wan prisiona hemi ronwe, yu tinkbaot amas mani bae i spend blong kasem hem bakegen,” Mr Hinge i talem.

“From long en blong dei, boy ia hemi wan citizen blong kaontri mo yumi mas helpem hem. So eim blong mifala hemi mekem ol bible stadi mo storian plante wetem olgeta we oli kamaot be oli no kasem sapot long famili memba espeseli.”

Director blong Correctional Services, Johnny Marango, i talem se isu ia i hapen evri taem mo hemi wan jalenj.

“Ol felo citizen ia i no reis long prison ; Mifala i trenem mo helpem olgeta blong kam ol gudfala persen mo hemi wok blong kavman be naoia ol komuniti jif, jej lida, Papa/mama mo famili memba blong akseptem olgeta,” Mr Marango i talemaot.

“Stigma blong lukluk nogud long olgeta hemi olsem seken kalapus. Taem i kat nogud lukluk ol pipol ia oli no fri yet. Mo yumi stap kriatem wan laef we i mo had mo hemi no hao yumi sud opereit. Yumi sud jensem tinktink mo aplaem ol ril value, biliv long kastom, kalja mo christian biliv.”

Mr Hinge i talem se prison haos hemi fulap evritaem taem oli ko visitim ol prisiona

“Mo bae i ko hed blong inkris; Yumi gro long wan kalja we yumi protektem ol love wan blong yumi blong loa i no kasem olgeta; Be sapos evri man Vanuatu oli save abaot raet blong olgeta long loa afta oli ron blong ripotem evri aktiviti ia, mi talem long yu bae i nogat man long street bae evriman i stap long kalapus. Ating yu kat wan man we oltaem i swe o slabem yu be from yu lovem hem, yu no ripotem hem from hemi pat blong kalja. Be sapos pikinini i save raet blong hem taem mama i swe long hem hemi ko ripotem hem.”

High Risk kalapus long Port Vila long ol kontena hemi 12-16 pipol insaed from oli stap muv araon. Remand hemi 60-70 pipol. Stade kalapus i kat 70-80 pipol we sam oli muv aot mo sam niu wan ko insaed.

“Age i no mekem jens insaed long kalapus from i kat pastor, apu we i holem walking stik, tija, jif, pikinini, i no longtaem i kat tri yang pipol i stap long kalapus from i nogat prison haos blong ,” Mr Hinge i talem.

“Age i stap long 13 kasem 70.”

Eim blong Chain to Life Ministry hemi blong brekem chain blong harem nogud mo crime tru long faith long christ blong stopem sin mo mekem ol gud choice long futja.

(Visited 222 times, 1 visits today)

About The Author

You might be interested in