Komuniti i fixim rod long point blong Malapoa Estate

Parents blong Matautu point long Malapoa Estate i fixim rod long wiken ia blong ol pikinini i save kat akses long bus blong ko long skul.

Eli Dennis, wan lokol komuniti memba blong North East Malekula we i liv long eria ia, i talem se oli nosave wet long ol othoriti blong fixim rod from skul i stat mo ol pikinini blong olketa i mas ko long skul.

“Samtaem mifala i wet long rod blong wan o tu haoa mo mifala i mas walkbaot i ko kolosap long Kawenu field blong fanem bus,” Mr Dennis i talem.

“I no hemia nomo, evri taem, taem mifala i stopem bus blong kam long Malapoa Estate, bae oltaem ol draeva i komplen from rod kondisen i nogud tumas mo hemia i had wee blong kambak long haos.

“Mifala i wet blong ol othoriti konsen i kam fixim rod mbe luk se nokat aksen nomo.

“Smol famili blong Not East Malekula long ples ia i kat ol pikinini we oli ko long skul mo evri dei mifala i mas aot blong faenem bus mo hemia i rili had.”

Mr Dennis i talem se oli disaed blong fixim rod blong mekem akses blong ol pikinini i ko long skul i mo isi.

“I no ol pikinini nomo mbe mifala tu blong ko long town,” hemi talem.

Bus Draeva, Jeffrey Noel, i talem se rod long point blong Malapoa Estate i wan rod we i nogud.

“Rod i nokud mbe mifala i mas ko, mi mas talem se, blong bus i ron long smol hill long eria ia, samtaem bus i nosave ko nomo from rod i nogud evri wan,” hemi talem.

“Ol pipol long eria ia oli rili fesem had taem from bus i mas putum olketa daon nomo mo oli walkbaot i ko antap long hill.

“Naoia ol pipol i luk se ol bus i no wantem stap ko antap long haos blong olketa so olketa nomo nao oli berem rod long man pawa.”

Bobby Smith, wan lokol expat residen, i bin kivim wan amaon blong vatu blong sapotem ol lokol long rod ripea ia.

“Komuniti hemi bes samting long wol,” Mr Smith i talem.

“Taem wan komuniti i stik tuketa, ol wok i save hapen.

“Mi wan olfala man, mi nosave fixim rod mbe mi save help long vatu.”

“Mo hemia i no abaot mani mbe komuniti i kam tuketa mo mekem wok.”

Mr Noel i talem se “Long lukluk blong mi, naoia rod i gud lelbet blong bus i save ron long hem from komuniti i berem kraon long ol pothole.”

“Mbe kwesten nomo sapos wan bigfala ren i kambak bakeken, mi no tink bae ol kraon ia i save stap longtaem,” hemi talem.

Ol mama, ol papa mo ol yangfala blong Not East Malekula i bin joinem han tuketa blong mekem rod ia.

 

 

 

 

 

 

 

 

 

 

 

 

 

 

(Visited 580 times, 1 visits today)

About The Author

You might be interested in