Seasonal wok i helpem famli long COVID

Sam seasonal wokman blong Vanuatu long New Zealand i talem se extensen blong ol wok kontrak blong olgeta i alaoem olgeta blong mekem moa mani.

Steve Morris, wan seasonal wokman long New Zealand, i talem se longfala taem we oli bin spendem blong wok from COVID-19, i mekem sam wokman i mekem gud mani mo impruvum laef blong ol famili bak hom.

Mr Morris i talem se plante wokman i bildim ol gudfala haos mo helpem ol famili long Vanuatu long saed blong skul fi.

Mr Morris i bin ko long New Zealand long yia 2019.

Hem i talem se, “Taem we kontrak blong mifala i vinis long 2020, mifala i nomo save kambak from COVID-19, i mekem se mifala i mekem vatu blong helpem ol famili.”

Long wik ia, VBTC Nius i witnesem ol seasonal wokman we oli bin ko wok long New Zealand blong ova wan yia, oli kamaot long kwarentin mo ko tekem aot ol item we i kam long ol kontena olsem ol car mo ol smol bot long Star Wharf long Port Vila.

Mr Morris i talem se COVID i mekem ol fraet mbe oli luk blessing taem oli kambak long Vanuatu.

Hemi talem tankiu bigwan long Kavman blong save pat long scheme ia.

“Fulap long mifala i pem car mo bot wetem ol nara item olsem ol armchair o ol tul blong haos,” Mr Morris i talem.

“Nomata long COVID, mifala i glad tumas blong save stap from long wan saed, sik ia i mekem plante lokol long Vanuatu i nomo wok mbe tru long sweat blong mifala ovasi i mekem se mifala i helpem olgeta.

“Mifala i stap blong ova 1 yia mbe mifala i sendem mani i kambak blong mekem ol haos.

“Plante long mifala i kat ol famili we oli kat ol pikinini we oli stap ko long skul, mekem se plante oli askem help i kam, mifala i sendem vatu i kam,” hem i talem.

Wan nara seasonal wokman we i no wantem nem blong hem i kamaot, i talem se blessing long hom i tumas.

Governor blong Reserve Bank, Simeon Athy, i bin talem long VBTC Nius se ol Ni-Vanuatu seasonal wokman long Australia mo New Zealand taem oli kambak long kaontri, oli karem vatu i kam insaed.

Hemi talem se taem vatu i kam insaet hemi kontribut long economic blong kaontri from naoia turis i nomo kam from COVID-19 .

Mr Athy i talem se wei we ol seasonal wokman i spend long edukesen mo mekem ol haos hemia oli kontribut long economi.

Mr Morris i talem se long period blong COVID-19 ia, ol wokman long New Zealand i save kambak wetem moa long wan million vatu.

“Hem ia i dipen nomo long managemen,” Mr Morris i talem.

“From plante seasonal wokman oli stap sendem mani i kambak long kaontri blong helpem ol famili.”

Mbe wan nara seasonal wokman we i stap long New Zealand, Lucas David, i talem se oli mekem mani mbe i gat ol expens tu blong olgeta.

“Yumi mas save se ol ples we mifala i slip long hem blong ko wok long ol fam long moning, mifala i mas pem tu,” hemi talem.

“Mifala i pem ol bus blong ko wok mo tu kakae blong mifala.

“Taem COVID i kam, mifala i no wok blong tu manis. Naoia mifala i stap wok blong tu taem nomo long wan wik.”

I kat ova 100 Ni -Vanuatu seasonal wokman long New Zealand i kambak long Vanuatu long manis May.

 

 

 

(Visited 420 times, 1 visits today)

About The Author

You might be interested in