Kumera long Tanna i luk risal blong marine conservation

Ol pipol blong Kumera komuniti long saot Tanna i hukum plante fish afta long tu yia tabu long solwota.

Tom Kiri, Fisheries Ofisa we i beis long Tanna, i talem se hemia i wan ae open long olgeta blong luksave impotens blong lukaotem ol marine risos.

Eria ia i stap anda long tabu blong pipol i no ko huk o kolektem shel long hem folem tumas havest blong marine risos.

Jeaman blong Fishing Association blong Kumera Komuniti, John Steven, i talem se risal blong ol caj long April ia i soem tru spirit blong ol komuniti i wok wetem fisheries dipatmen.

“Mifala i ko fishing tete, mifala i luk se mifala i kasem moa caj bitim bifo, “ Mr Steven i talem.

“Ol fish we ol apu blong mifala i stap luk bifo we i lus blong amas yia, mifala i hukum bakeken.

“Ol fish size we mifala i hukum, i bigwan we bae mi mas admitim.

Mr Kiri i talem se long April, afta long sam arenjmen mo toktok bitwin fisheries dipatmen long Tanna mo ol lokol long saot Tanna, mifala i mekem disisen blong openem solwota long wan dei blong ol pipol i huk.

“Ol lokol i bin kam talem long mi se yes oli wantem pruvum se i tru se wan tabu eria blong risos oli save hukum plante fish.

“Mo long dei ia nao oli pruvum.”

Fisheries Ofisa, Mr Kiri, i talem se kaen fasin olsem, hemi blong helpem ol komuniti mo ol aelan blong lukaotem ol marine mo fisheries risos blong olketa.

“Yumi mas kontinu blong protektem ol marine risos blong ol nara kaostal vilij i luk mo learn long hem folem situation blong COVID,” Mr Kiri i talem.

“Yumi stap long lok daon mbe yumi rij long ol risos long solwota, mo yumi mas learn blong lukaotem gud from ples ia nao taem yumi nokat mani blong tin o mit long sto mbe yumi kakae long solwota.

“Kain tabu olsem i hapen finis long samfala aelan long Vanuatu we oli wok kolosap wetem fisheries Dipatmen.

Wan long olketa wok blong Fisheries wetem ol komuniti long Vanuatu i blong helpem olgeta blong protektem mo sefem ol marine resos blong olgeta.

Komuniti blong Kumera long saot Tanna i putum tabu blong fishing long wan eria blong solwota we i kasem 2 KM blong man i no huk o kolektem ol shel long tabu eria ia.