Kwarentin i kobak long 14 dei

Ministry blong Health i putum bak 14 dei kwarentin folem risk blong ol niu COVID -19 virus we i stap kam antap.

Director General long Ministry blong Health, Henry Vira, i konfemem tete mo talem se 14 dei kwarentin ia bae i aplae long fes repatriation flaet we bae i kam long Sunday February 6 we hemi long wiken ia.

Director General Vira i talem long VBTC Nius se disisen ia i folem wan miting we Health Emergency Advisory Committee i bin kat long Wednesday aftanun.

“Mifala i mit mo tok araon wetem  sam senior ofisiol blong yumi, i kat tinktink kobak blong talem se even clinikol advaes i kam blong 10 dei mbe yumi sud givim enaf taem from naoia i kat ol difren virus blong covid-19(Delta mo Omicron variant) we i i stat blong kam antap, so yumi no rili sua,”Mr Vira i talem.

“So sapos i kat wan virus we hemi kam long incubation period period blong hem i no semak long wanem yumi bin stap luk mbe yumi mas pripea from hem ia. I mekem se yumi disaed blong kwarentin i kobak long 14 dei.”

Mr Vira i talem se ol pipol i mas tinkbaot tu ol tes blong evri pasenja we i kam long wan plen.

“Yumi talem ol tes blong 10 dei mbe ating taem ia bae yumi  nosave vinisim long taem bifo yumi rijim 10 dei i mekem se health emergency advisory committee i tekem disisen blong stap long sef saed mo kwarentin i kobak long 14 dei,” Mr Vira i talem.

VBTC Nius i kasem toksave se dikris blong 10 dei kwarentin long January hemi folem i tekem wan kasem faev dei long kwarentin blong faenem wan virus beis long evidens we health i talem.

Kwarentin kost blong wan naet hemi VT 7,500 mo hemia i no inkludim kakae.

Hemi wan mas blong National COVID-19 Tasforce Committee blong evri pipol we i enterem Vanuatu i mas soem certificate blong vaccination blong talem se oli tekem tu stik blong COVID-19.

VBTC Nius i andastanem se eni pipol we i no tekem stik blong COVID-19 i nosave kam insaed long kaontri.

 

(Visited 737 times, 1 visits today)

About The Author

You might be interested in