Kwesten long apgred blong Lonsdale College

Memba blong Palemen blong Banks Islands i kwestenem apgred blong Lonsdale Memorial College long Torba Provins.

Honoroble Danny Silas i talem long Fes Ordinary Sitting blong Palemen long eli wik ia, se Administration blong Lonsdale Memorial College i bin kivim wan petisen blong Kavman i help bildim gud ol fasiliti blong skul ia.

Hemi talem se petisen ia oli kivim long Minista blong Education mo Training, Honoroble Simeon Seule, long ofisiol visit blong hem i ko long Torba long March yia ia.

Mr Silas i talem se skul ia i nidim apgrade long hem kwiktaem.

“Yumi luk skul i sta long wan standard wei emi no stret nomo from hemi only college we i provaedem education seves long evri skul pikinini long Torba,” Mr Silas i talem.

“Mi wantem askem nomo, afta long visit blong yu, Honoroble Minista blong Education, ol petisen we skul emi givim e kam long yu olsem minister blo education , wanem nao tinktink blong yu after wei u visit? Yu kat eni tinktink blong apgradem skul blong mifala.

“Yumi mas save hemi onli secondary skul long provins.”

Minista Seule i rispon mo talem se Lonsdale Memorial College i stap long plan blong wok blong apgradem ol fasiliti blong skul ia.

Hemi talem se hemi pat blong seves diliveri blong kavman.

“Olsem yumi save hemi long proses blong wok blong shipim ol materiol i ko kasem Torba,” Minista Seule i talem.

“Mi tingse oli sendem sam material vinis i ko mbe mi askem Memba blong Palemen blong Banks, Mr Silas blong save kam long ofis blong Ministry blong Education blong yumi jekem se wok i mas ko hed.”

Lonsdale Memorial College i stap long aelan blong Vanualava long Banks Islands.

 

 

 

(Visited 345 times, 1 visits today)

About The Author

You might be interested in