Kwesten long fes COVID-19 komuniti kes- Efate

Wan Memba blong Palemen blong Port Vila,  Anthony Iauko i talem se hemi no brekem eni kwarentin rul olsem we pipol i stap talem.

Hemi mekem toktok ia folem wan kol we Opposition i mekem blong i gat investikesen long aksen blong Prime Minista, Deputy Prime Minista mo Mr Iauko.

Lida blong Opposition, Honoroble Ralph Regenvanu, i talem long wan writen steitmen se i nid blong i kat investikesen i ko insaed long ol alekesen se oli brekem protocal blong health long saed blong kwarentin.

“Long evri nara taem long las tu yia, taem i kat inkris COVID-19 kes hemi kosem kavman blong stopem inhud international pasenja flaet, long tis taem long namba 20 February, Prime minista i bin anaonsem wan inkris long kwarentin ples mo semak taem hemi anaonsem ol plen blong kam insaed bakeken, long semtaem we hemi stap toktok Deputy Prime Minista i bodem plen vinis long New Zealand blong kambak mo long plen we hemi kam long hem, hemia nao i kat 19 konfem kes blong Omicron we sam hao wan Memba blong Palemen, Anthony Iauko hemi ko insaed long kwarentin sam namba blong taem, yumi nosave, wanem hemi mekem, hao kam hemi kasem COVID mo long tu wik hemi stap pas pasem long komuniti, ” Mr Regenvanu i talem.

“Lastly Deputy Prime Minista, o yestete hemi kamaot long kwarentin witaot wan propa medikol kliarens, evri kolik blong hem we oli bin kam long sem flaet wetem hem, evri wan i mas stap yet long kwarentin, hem i yusum politikol pawa blong hem nomo blong i kamaot.

Public Relation Ofisa blong Kavman, Fred Vurobaravu, i sakemaot ol alekesen akensem Praem Minista blong talem se Deputy Praem Minista, Honoroble Ismael Kalsakau i kam long wan flaet we hemi stap long plan finis we National Disasta Committee hemi apruvum mo hemi no wan spesel flaet.

Hemi talem se Mr Regenvanu i nosave talem se flaet ia hemi tekem COVID-19 from i bin gat ol flaet i kam long New Caledonia mo Australia.

Mr Vurobaravu i talem se ol flaet ia i tekem i kambak ol famili mo ol vota blong Lida blong Opposition tu.

MP Iauko i toktok wetem VBTC Nius aot long kwarantine eria we hemi stap long hem tete mo sakem aot ol alekesen akensem hem se hemi brekem protocol taem hemi visitim ol fren blong hem we oli kam ovasi long kwarentin mo taem ia hemi kasem COVID.

MP Iauko i talem se hemi bin stat filim i sik afta we hemi bin visitim Vila Central Hospital blong kivim blood long last Tuesday.

MP Iauko hemi promes lo pablik se hemi no bin brekem kwarentin protocol.

“Mi kamaot pablikli blong talem nomo se ol protokol mesa ia yumi no even brekem wan; mi no even ko insaed sapos yufala i stap harem sam alekesen, mi neva ko insaed long wan long ol kwarentin site,” Mr Iauko i talem.

“Mi nosave se ol man we oli stap mekem ol alekesen ia, oli tekem ol infomesen blong olgeta long wea mbe mi olsem Memba blong Palemen blong Port Vila, we mi stap toktok long yufala naoia, mi save kivim ful asurens se no, i neva kat wan such tink we i bin hapen.”

Deputy Prime Minista Ismael Kalsakau, i talem se hemi karem ful konfemesen long helt blong aot long kwarentin.

“Infomesen we mi kasem se i nogat eni samting i blokem mi, afta mi talem se wael mi wet long rilis leta blong mi blong mi aot, then bambae mi aot, so mi stap gogo kasem Sunday aftanun, mi risivim infomesen se mi save rilis, then mi aot.”

Mr Kalsakau i agri wetem Mr Regenvanu se i nid blong kat investigesen long hao COVID-19 long komuniti i spread.

“Mi kwestenem weta i tru o nogat se hemi brijim kwarentin, mo persen ia we oli talem se hemi ko luk hem i kamaot long fesbuk mo talem se hemi kiaman toktok evriwan,” Mr Kalsakau i talem.

“So yumi no stap fid long infomesen we hemi kiaman, investigatem gud, MP Antony Iauko hemi availabol blong yu ko askem long hem, mo bae hemi talemaot long yu stret long wanem i hapen, mo letem investigasen bae i ko aot blong talem se hu nao bae i tru,”

Mbe Mr Regenvanu i talem se bai hemi mekem wan ripot long polis akensem Mr Kalsakau mo Prime Minista, Honoroble Bob Loughman mo MP Iauko blong mekem sua se i kat investiksen i hapen.

Mr Vurobaravu i talem se plan ia kavman i bin anaonsem finis bifo anaonsmen blong Fes COVID-19 komuniti outbreak long Port Vila mo bae i gat investikesen olsem we pipol i askem.

Hemi talem se prioriti blong kavman naoia hemi blong dil wetem komuniti situation we i stap from pipol i nidim help.

Mr Vurobaravu i talem se Mr Regenvanu olsem wan lida blong wan politikol pati hemi mas putum oda long saed blong opposition tu taem sam long ol pati blong hem i no wantem tekem COVID-19 vaccine mo tok akensem wan National Helt isu.

Hemi se Mr Regenvanu hemi sud tekem olgeta i kambak long laen.

 

 

(Visited 1105 times, 1 visits today)

About The Author

You might be interested in