Kwesten long opening blong Lajmoli airport

Pipol blong not west Santo i kwesten fail promes blong Kavman blong openem Lajmoli airport long Santo sins 2020.

Jif Senimao Tirsupe long Wunon vilij, Santo, foma presiden blong Malvatumauri Council blong ol Jif,  i talem se kontinu dilei long trip blong kavman i mekem pipol i harem nogud tumas.

Jif Tirsupe i talem se oli bin mekem tri taem preperesen olsem promes blong kavman blong openem airport ia.

“Mi andastan se dilei blong graon breaking ia ating from kavman i faenem i had blong kam daon long ples ia,” Jif Tirsupe i talem.

“Problem blong yumi long ples ia hemi from weta.

“Seken preparesen blong yumi, mifala i bin pripea wan manis i pas, mbe dilei blong kavman bakeken from oli stap pas long Kot.

“Ol pipol blong mi oli harem nogud tumas from dilei ia.”

Administrator blong not west eria kaonsel long Santo, Vula Charlie, i talem se airport ia hemi doa wei blong olgeta mbe taem i klos i mekem laef blong pipol i had tumas blong kasem ol seves we pipol i nidim.

Hemi se plen i nomo sevesem Lajmoli longtaem nao afta long wan plen krash long eria ia.

Mr Charlie i talem se ol pipol i spendem VT40,000 long wan wei nomo blong ko long Luganville town.

“Mifala i stap kwesten se from wanem nao kavman i stap mekem olsem,” Mr Charlie i talem.

“Airport ia hemi wan doa wei blong developmen i kam in mo tu isi akses long eria kaonsel blong kam mo ko aot espeseli long saed blong maket.

“Mo tu transpotem ol sik pipol i ko long Luganville town.

“Hemi rili disapointing blong ol lokol long notwest Santo i arem se airport bae i open mo afta i no hapen.”

Mr Charlie i talem se hemi kasem plante kwesten long ol jif se from wanem kavman i stap mekem olsem mo kivim wan kiaman hop.

Minista blong Infrastructure mo Public Utilities, Honoroble Jay Ngwele, i asurum pipol blong not west Santo se bae kavman i faenem wan stret taem blong ko mekem kraon breaking seremoni blong Lajmoli airport.

Hemi talem sori long dilei long prokram we ministri blong hem i kosem.

Lajmoli Airpot i nomo operate folem wan plen krash long eria ia long 2008 folem wan thick fog we i mekem pilot i nosave luk ples i klia.

Mo risal blong plen crash ia, i kosem pilot i ded mo sam pasenja i kasem ol kil long bodi blong olgeta.