Kwesten long operational COVID alaowens

Ova 30 studen nurse i kwestenem wetaem bae oli kasem operational alaowens blong COVID outbrek long March.

Plante long ol studen nes ia oli ol fes mo seken yia studen we oli no kasem smol vatu blong olgeta yet.

Wan sos i talem se oli wok tri dei long wan wik stat long March kasem May.

Long World Nurse dei long 12 May, Minista blong Health, Bruno Leingkone i bin talemaot se hemi bin kasem wan petisen blong mas pem risk alaowens blong ol Nurse mo hemi wan mas blong oli pem.

Insaed long operational alaowens wan studen nurse i entitle long 3,000 wan dei, Communication oli providem credit, kakae mo transpot mo oli pem VNPF kontribusen.

Be wan studen nurse we hemi spendem nambatri yia long Vanuatu College of Nursing Education, i talem se stori ia i ko difren from oli jes kasem smol vatu long manis May mo oli pem olgeta 995 vatu wan dei.

Hemi talem se sam nurse oli wok 12 haoa mo sam 8 haoa nomo.

Hemi talem se sam oli pem own kakae blong olgeta.

Wan reliable sos i talem se mani ia i impoten.

“Mifala i riskim laef ia blong sevem ol pipol blong Vanuatu long wan taem we i no nomol,” Hemi talem.

Long March 16 ol studen nurse oli bin saenem kontrak blong help aot long COVID afta long fes komuniti kes outbreak long Port Vila long March 5 2022.

I kat infomesen tu sam dokta we oli wok tu long taem ia i no kasem risk alaowens blong olgeta yet.

VBTC Nius i kasem infomesen long wan Health sos se bae oli pem ol studen nurse ia taem oli kasem apruvol blong Public Service Commission.

Mo hemi nosave talem se wetaem.