Kol blong rimuvum kwiktaem Big Sista ship

Lamap Marine Conservation i kol long ona blong ship, Big Sista blong rimuvum kwik taem vessel ia.

Big Sista i bin wreck long Tuesday wik ia insaed long eria blong Lamap Marine Conservation long Saot Malekula.

Lamap Komuniti i askem strong long ona blong vessel, Big Sista o Kavman blong rimuvum ship ia kwik taem long eria ia.

Chairman blong Lamap Marine Conservation, Joseph Soksok, i talem se vessel ia i bin mekem bigfala damej long conservation eria ia.

“Mifala i kat konsen folem toktok blong Supercargo blong ship long moning we hemi askem help long kavman blong hemi save help blong karemaot ship,” Mr Soksok i talem.

“From taem we ship hemi kam insaed long rif, hemi brekem ol rif mo hemi kilim sam giant clam, grin snail mo sam troka.”

Mr Soksok i kol tu long ona blong ship blong lukluk long ol damej we vessel ia i kosem long eria ia.

“Mifala i stap askem tu long ona blong ship blong lukluk long damej ia long we i spolem,” Hemi talem.

“Bambae ol jif long komuniti i sitaon blong raetem wan leta i kam long Vila blong talemaot ol damej ia.”

Mr Soksok i talem se oli fraet tu sapos i gat eni leakage we i save kosem moa damej long eria ia.

Big Sista vessel i wreck i stap yet long eria ia sins Tuesday moning.

Supercargo blong ship Big Sista, Shem Tarson, i talem se hemi no save kivim komen long hao ship i bin reck.

Mr Tarson i talem se tete hemi namba tri dei we ship i silip long Lamap yet.

“Yumi nidim sam asistens from MV Big Sista i helpem bigwan ol pipol long Vanuatu,” Mr Tarson i talem.

“So sapos kavman i save helpem mifala blong yumi kontinu long seves ia.”

Mr Tarson i konfemem se i nokat eni insiden i hapen long ol pasenja.

Mbe oli bin stap help muvum olgeta i ko long Litzlitz Wharf long Central Malekula blong oli ko long ol nara ship.

“Stat long 2o’klok yestete moning(Tuesday moning) kasem naoia ship i stap yet long Lamap, wan nara ship i kam pulum mbe from hemi smol mo rop i brok; ating bae oli mekem namba seven taem naoia,” Mr Tarson i talem.

“Mifala i stap sendem ol pikinini blong Santo i ko long Litzlitz blong oli ko long nara ship mo boss blong MV Big Sista bae i pem kost blem.”

Lamap Marine Conservation eria i kavremap wan eria blong 3kilomita we Lamap Landing i stap insaed long hem tu.

Lamap community i statem marine conservation eria ia long 2011.